Aizawl: Zemabawk Local Council-ah sorkarna siam thei an awm loh avangin thiah a nih thu nimin khan Aizawl Municipal Corporation (AMC)-in hriattirna a tichhuak.
Thiah a nih thu hriattirna hi AMC Commissioner Zothanmawia chuan tichhuakin, Zemabawk Local Council-ah hian member thenkhatin an awmna party an chhuahsan avangin sorkarna siam thei an awm loh thu Zemabawk Local Council secretary hnen atanga ziaka an dawn hnuah, thil awm dan chhui chiangin sorkarna siam thei an awm lo tih an finfiah hnuah thian a nih thu hriattirna hi tihchhuah a ni ta a ni.
Zemabawk Local Council hi thiah ni mah se, dan ding lai angin tuna Zemabawk Local Council secretary ni lai, Kalvari Tlangmawia hian a aiawhtu tur mi dang ruat a nih hma chuan a mawhphurhna chelh zui tura tih a ni.
Zemabawk Local Council thiah a nih tak avang hian local council chairman seal leh lehkha pawimawhte chu August 18, 2022 ral hmaa AMC-ah theh luh vek tura tih a ni bawk.
Member pasarih awmna, Zembawk Local Council-ah hian MNF hian member pali neiin sorkar an siam a. Congress-in member pahnih neiin ZPM-in member pakhat an nei ve bawk a. Tun hnai khan Congress leh MNF member pakhat ve vein an party chhuahsana ZPM an zawm avangin sorkar siam thei an awm rih lo nia thu dawn a ni.