Aizawl: BJP Mizoram Pradesh chuan social media-a ram danpui, India Constitution thar buatsaih leh India ram khawpui sawn tur anga thu theh darh chu dawta BJP puhna leh mipui bum tumnaah puhin nimin khan Cyber Crime Police Station-ah FIR an theh lut.
Tun hnaia phai lam media thenkhata ram danpui thar buatsaih leh India ram khawpui, New Delhi pawh Varanasi (UP)-a sawn tur anga thuziak hmuh tur a awm chu, Mizoramah mi thenkhatin BJP beihna hmanruaah sawi lutin, BJP-in ram danpui thar buatsaihin Hindu-a inlentir vek tum anga mipui tihthaih nan thu an vawrh darh mek chu pawi an tih thu BJP Mizoram Pradesh chuan an sawi.
FIR an theh luhah hian Mizoram BJP chuan, ‘Social media group hrang hrangah BJP-in India Constitution duang thartu drafting committee dinin mi thiam rualin an ching let fe ta mai. AAP sorkar nghehna, Delhi chu India capital ni tawh loin Kashi (Varanasi)-ah sawn an rawt a. Kristian leh Muslim-te chuan vote an nei tawh dawn lo,’ tih lam hawia thu thehdarh a ni a. Times of India chhuakah ‘BJP emaw, political party lam emaw a inziah loh thu leh thukhawmte pawl hming pawh inziak a awm lo’ tih sawiin, hetianga thu belhchian dawl lo hmanga sakhaw rawngkai leh India khua leh tui te inkara inhuatna awm thei thu theh darh tura siamtu zawn chhuahsaka dan anga hma laksak tura ngenin FIR an theh lut a ni.