Tun hnaiah social media-a video thehdarha hmeichhe nau paw lai sawisatua puh, Lalramdinsanga (25) Siahatlah-II chu nimin khan Siaha Police-in an man.
August 15, 2022 khan sawi zui hlawh tak kut inthlak lai lanna video, second 30 bawr vela sei chu social media-ah a darh nasa hle a. Video-a lan dan chuan mipa pakhatin in chhungah hmeichhe nau paw lai chu sawisain, chhuata nau paw chunga let reng chu a pet a, a tlawh bakah a bula thingfakin a vaw zui a, nuin a puak naupang tap rawng rawng thawm hriat tur a awm bawk.
He kut inthlakna chungchang hi district hrang hranga police-ten an huam chhunga thil thleng a nih leh nih loh an chhui zui nghal a, pawikhawihtua ngaih hi Siahatla-II-a mi a ni tih hriat chhuah a ni a; nimin khan manin Siaha Police Station-ah dahin thubuai ziah luh nghal a ni.
Mizoram Police hotuten The Zozam Times an hrilh danin, hmeichhe kutthlaktua puh hi Lalramdinsanga, Siahatlah-II nia hriat a ni a, a sawisak hi a nupui, kum 24 mi a ni.
Thudawn danin, Lalramdinsanga’n a nupui kut a thlak hun hi August 13, 2022 tlai dar 6 bawr vel a ni a. Kutthlaktu hian a feh hawng in a thleng chu a nupuiin zu a lo rui tih a hriatin kut a thlak ta niin a insawi a, a mipa zawk pawh hian zu a rui tho nia thudawn a ni.
He thil thleng chungchangah hian Mizoram State Commission for Women (MSCW) chuan hma la nghalin, hmeichhe zahawmna leh dikna chanvo tihbawrhbanna nasa tak a thleng nia lang leh naupang pawisawi lo chunga tawrhna thleng nia langte chu rang taka chhui chian tula an hriat avangin suo moto cognizance lak ngei theihna turin nimin khan thubuai an ziak lut.
MSCW chuan hmeichhe chunga kutthlaktu mipa hi a rang thei ang bera mana dan anga hremna pek a nih ngei theih nan theihtawp chhuaha hma la turin Director General of Police (DGP) chu nimina khan hriattirna an pek bawk.
Commission Chairperson Lallawmchhungi chuan he video rapthlak tak hi an phone atanga delete turin mipui a ngen tih The Zozam Times a hrilh a, hetianga pasalte lakah emaw, mipa chunga kut tuar emaw, hleilenna thleng a awmin commission hnenah hriattir vat thin turin mipuite an ngen a, hmeichhe dikna chanvo palzutna chu dan kalh a nih avangin pawikhawihtuten hremna an tawh ngei nan hmalak a ngai tih a sawi.
MHIP General Headquarters pawhin hmeichhe chunga rawng taka kut inthlakna thleng hi an dem tak zet tih sawi bawkin, he thil thleng chungchangah hian nimin khan MHIP hruaituten Aizawl SP C Lalruaia chu a pisaah hmuin, hmeichhe kutthlaktu mipa chu dan anga hrem ngei turin an ngen a ni.