Congress party hruaitu hlun, hun eng emaw chen atanga an party inrelbawl dana duhkhawp lohna lian tak nei tawh, Ghulam Nabi Azad chu Jammu & Kashmir-a an party chhunga nihna pawimawh tak atangin a bâng a, party laka helna lam a thleng dawn em tih ngaihchan mek a ni.
Azad-a hi an party hian campaign committee chairman atan a ruat a; mahse, ruat a nih hnu lawkah a bâng zui nghal a. A nihna thar atanga a bân piah lamah hian an party-a Jammu & Kashmir political affairs committee-a a nihna pawh a bânsan.
Sawi dan thenkhatah chuan Azad-a hi an party-ah hian All-India Political Affairs Committee-ah member a ni sa reng a, chanvo thar an pek chu hniam zawka an dahna niah a ngai a ni.
Hruaitu hlun, chief minister pawh lo ni tawh hi union minister pawh ni tawhin party-ah chanvo lian tak tak a lo chelh tawh bawk a. Kum hnih liam ta khan mi dang 22-te nen party chief Sonia Gandhi hnenah lehkha thawnin an pawl kalphung an duhkhawp lohna leh insiam rem leh insiksawi an ngaihna laite an lo thlen tawh a ni.
Azad-a a bân hma, thla hmasa lawk hian a lamtang reng, Ghulam Ahmed Mir chu Jammu & Kashmir Congress unit-ah chief a nihna laksak a ni tawh bawk.
Party hian union territory-a an pawl chu nasa taka siksawiin Mir-a aiah hian Vikar Rasool Wani an dah.
Hruaitu a siksawi bakah Gandhi-i chuan Jammu & Kashmir-ah hian campaign committee, political affairs committee, coordination committee, manifesto committee, publicity & publication committee, disciplinary committee leh Pradesh election committee a din bawk niin news agency Press Trust of India chuan a tar lang.