Mizoram sorkar flagship programme Socio Economic Development Programme (SEDP) hnuaia chhungkuaa tanpuina sum sem bul tanna chu August 19, chawhma dar 11-ah Vanapa Hall-ah neih a ni dawn.
SEDP sem bul tanna pual a inkhawm buatsaih tur hi Deputy Chief Minister Tawnluia, SEDP Executive Board Chairman-in a kaihruai ang a, Chief Minister Zoramthanga’n SEDP sum sem tur cheque pe chhuakin, thuchah a sawi bawk ang. SEDP Executive Board-a member secretary Pu Lalmalsawma Pachuau-in SEDP kalpui dan report a pe dawn bawk.
SEDP sem bul tanna inkhawm buatsaih turah hian MNF party pawhin thuchhuah neiin, he inkhawmah MNF block tin atanga aiawh panga leh unit aiawh mi 10 in tir turin Block leh Unit te an hriattir.
August ni 15, 2022 a Independence Day lawmna Lammual a neihah khan Chief Minister Zoramthanga chuan thuchah a sawinaah SEDP chungchang sawiin MLA bial tinah tanpuina sum pek tur mi 1500 an awm a, Mizoram pum a tanpuina pek tur chu mi 60,000 an ni dawn tih leh chung mite chu an eizawnna duhthlanah bul an tanna turin Rs. 50,000 pek an ni dawn a, he programme kalpui nan hian a vaiin sum Rs. Vbc. 328.13 ruahman a nih thu a sawi.