Tun thla tira 5G spectrum lilam zawhfel a nih khan a tak ram thlen hun tur tinzawn nghal niin, hman theih a nih hun tur te, a man chungchang leh hmang hmasa ber tur te nen lam hriat theih a ni ta.
Airtel hi tun dinhmuna chiangkuang taka a kalpui hun tur sawi thei awmchhun a ni deuh mai a, kumin kumtawpah India ramah 5G services kalpui hman tumin, thingtlang lama chengte erawh chuan 2024 an nghah a ngai thung ang.
Lehlam chuan Vi hian a kalpui tur hun tak a la sawi thei lo thung a, Vi leh Airtel elpui lian ber Reliance Jio hian tun thla chhung hian 5G service kalpui a tum ve bawk a, engtak anga maw?
Vi hian khawpui bik 5G service kalpui a tum dan leh hun tur chungchangah thu mumal a la nei thei lova, sorkar lam erawh chuan khawpui lian zual 13- Delhi, Gurugram, Mumbai, Pune, Chennai, Kolkata, Bengaluru, Hyderabad, Chandigarh, Lucknow, Ahmedabad, Gandhinagar, leh Jamnagar ah te hman hmasak ber a nih tur thu tunhma lamah a lo sawichiang tawh a, kumin kumtawp lam hian khawpui lian leh te deuh te’n an zui tura ngaih a ni.
Vi hian a lo berah khawpui pathum Delhi, Mumbai leh Bengalau a tuam hmasak ber rinna a lian a, Pune leh Gandhinagar ah te 5G service hi a vawrhchhuak thut thei bawk. Ericsson nen tunhnai khan enchhinna an nei nia sawi a nih bawk avangin an che har lutuk lo turah an ngai.
May thla khan Pune-ah Vi leh Ericsson te hian download speed 5.92 Gps an kalpui hmana sawi a ni a, India rama download dan tlangpui hi July 2022 khan 19.57 Mbps niin, an kalpui tak tak a nih chuan boruak an vai vung nasa hle tura ngaih a ni nghal.
Ramchhunga 5G service kalpui mai theih a nih dawn hnu hian aman chungchangah inrinsiakna a tam zui hle a, man to deuh tura ngaih karah sorkar leh company lam chuan chuti vaka hautak turah an ngai lova, report thenkhatah phei chuan tuna 4G service kan hman nen hian intluk thuak tura sawi a awm. Hun in a la rawn hril thuai turah ngai ang.