Finnish Prime Minister Sanna Marin-i chu intihhlimna hmuna nasa taka a lâm lai video thehdarh a ni a, ram hruaitu lu ber khawsak dan hian an ramah sawi leh sel a hlawh nasa hle.
Social media-a video darhah Marin-i hi a thiante bakah Finnish milarte nen hlim takin an lâm a, an zai nasa hle bawk.
A chet dan hi eptuten nasa takin an sawisel a, hruaitu pakhat phei chuan ruihhlo a tih leh tih loh endik (drug test) ngei a phut.
Kum 36 mi chauh, Marin-i hian ruihhlo chu a tih loh thu leh zu erawh a in thu a sawi a, hlim takin an party mai niin a sawi.
Khawvela prime minister naupang ber hian an party thu hi a zep lem lo va, rimawi kûtpuia a kal lai thla pawh lak fuh a lo ni tawh.
Nikum khan Covid-19 kai nena inhnimhnaihna tak nei chunga club-a a lo kal avangin ngaihdam dil ngaiin a awm tawh bawk.
An intihlim lai video a darh hnu lawk, Ningani khan a chetla lai chu video-a lak a ni tih pawh a hre reng a, a darh ta mai erawh mak a tih thu a sawi.
“Ka lam, ka zai a, kan intihlim a, dan huam chin vek a ni. Thil dang (ruihhlo) nen erawh tih leh hriat ka nei lo,” a ti.
Eptu hruaitu, Riikka Purra chuan Marin-i hi drug test ngei turin a ti a, prime minister lakah thil rinhlelhawm tak a awm niin a sawi.
Eptu hruaitu dang prime minister bakah chanchinbumite an dem a, ram tana thil pawimawh zawk buaipui lova party lam an ngaihven chu tha an ti lo.
Marin-i chuan chanchinbumite hnenah, “Chhungkaw nunhona ka nei a, hnathawhna lama nun ka nei a, ka thiante nena zalen taka awmna hun ka nei bawk a. Ka kum rualpui mi dangte nen danglamna a awm lo,” a ti.
A khawsak phung thlak danglam pawh a tum lo tih a sawi a, “Tun thlengin a hmaa mi ang reng tho kha ka la ni a, chutiang chuan mite pawhin min pawm ka beisei,” a ti.
Marin-i hian December, 2019 atang khan thuneihna changin an party chuan an tan hle.