Aizawl: Mizoram Pradesh Youth Congress Committee (MPYCC) chuan sorkarna chelh mek, MNF party mi leh sa an inlulingah an puh.
Nimina an thuchhuahah Congress Thalai hian Mizoram mipui hriat tura hmun hrang hrangah sorkarna chelh mek, MNF mi leh sa, block leh unit hruaitute chu an inlulingah puhin, “Sorkar department director leh secretary te, an pisa chhuahsan tawhte pawh ko let leh ngam khawpin an che a, officer leh sorkar hnathawkte zahpah lo takin an tawng khum a, transfer-a invai thawm hriat tur awm rengte hi pawi kan tiin, Mizoram hun kal leh zel tur atan tha kan ti lo takzet a ni,” an ti.
MPYCC hian ruling party mi leh sate mai bakah, mipui thlan ruling MLA meuhin PWD officer a rikrap te, Sub headquarters YMA hruaitute transfer-a an vau thawm te, ruling MLA faten YMA branch pakhat hruaitute kut an thlak thawm awm te bakah, tun hnaiah chief minister fanu nia sawiin daktawr pakhat zahpah hlek loa kut a thlak leh a tawng khum lai hmuh tur awmte avang hian MNF kaihhruai sorkar hnuaiah Mizoram mipuite an zalen lohzia leh dan leh thupek kenkawh kawnga hlawhchhamah an ngaih thu an sawi.
Congress Thalai hian tun hnaiah police-in thubuai an ziah luh a pung ta thur thur te, Mizoram hmun hrangah zu leh ruihhlo, a bikin heroin No. 4 tawlhruk a hluar tharin, thuneitu execise leh police-ten an inman tam siak ta emaw tih tur khawpa nitin maia ruihhlo man thu chanchin thara hmuh tur a awmte hi dan kengkawhtu sorkar berin a tih tur a tih loh vangah puhin, zu leh ruihhlo do kawnga home minister berin YMA-te hial a pun ta mai chu MNF sorkar rintlak lohzia leh mipuite himna tura innghah ngamna an nih lohzia a chiang hle tih an sawi bawk.