|| Biden-a leh Putin-a inbe mai thei
China hruaitu, Xi Jinping leh Russia President Vladimir Putin te chuan November thlaa Bali-a Group of 20 summit neih turah an tel dawn niin Indonesian President Joko Widodo chuan a sawi.
“Xi Jinping chu a lo kal dawn a. President Putin-a pawhin kal a tum thu min hrilh tawh,” tiin Jokowi tia an sawi thin bawk, Widodo chuan Bloomberg News-in an kawmnaah a sawi.
Tun hi heng hruaitu pahnihte summit-ah an tel dawn tih tihchianna hmasa ber a ni.
Tun tum summit tur hi Russia-in Ukraine a rûn hnu leh Taiwan chungchanga boruak lian tak a awm hnua khawvel ramte inhmuhkhawmna lian hmasa ber tur a ni.
Xi-a’n January, 2020-a Covid avanga an ramri an khar hnua China chhuahsana a zin leh hmasak ber tur a ni bawk a. Ramri an khar hnuah hian kumin July 1 khan an kuta Hong Kong hlan let a nih kum 25-na pualin a chhuak tawh thung.
November-a summit neih tur hian ngaihven a hlawh hle a, United States President Joe Biden-a pawh tel tura ngaih a ni a, Putin-a nen hian an inbe dawn em tih erawh hriat a ni rih lo.
Report thenkhatah erawh chuan summit neih hma emaw, neih chhungin hun awl remchangah emaw Biden-a leh Xi-a hi an inbe dawn nia tar lan a ni.