US Open hmeichhe champion lai Emma Raducanu chuan karleh a New York a khelh tur inelna atana a inbuatsaihna tournament-ah duhthusam a tha in bul tan mahse a zinkawng a tawp a. Seeded number 7 hi Jessica Pegula a hneh lo.
Cincinnati a Western and Southern Open-ah Raducanu hian round hmasa pahnihah Serena Williams leh Victoria Azarenka te a sawp a, mahse round of 16-ah Pegula hi 7-5 6-4 in a hneh lo.
Raducanu hian Grand Slam champion hlui pahnih lakah kheltha hle mahse an khingpuite an kum a tam tawh avangin chona lian an ni lo nia ngaihna a awm a. Pegula nen erawh an inkhel tawk hle.
Pegula hi an inkhelh chhungin a che vel leh a ball vuak a dik a, court chhungah a tlan kual zung zung thei awlsam.
Hei vang hian Raducanu hian tum dang aiin vaw dik turin tan a lak nasat zawk a ngai a. US a hard court-ah ball vaw dik turin huai zawka a inkhelh ngam a lang a, ball vuak nat lutuk leh vuak sual pawh a nei ngun.
A tlawm hnuah amah pawhin hei hi sawiin, “Cincinnati hi ka tournament khelh tawh thin hovah chuan ball vuak ka huaisenna hmun a ni a, tunkarah pawh huaisen takin ka khel leh ang tiin ka rilru ka siam. Ka tisual a nih pawhin a pawi lo, a ai zawnga nasa in ka uang tiin ka inhrilh.” a ti.
US Open prize money a tam
Kumin US Open-ah player tel zawng zawngin sumfai an dawn tur chu Dollar maktaduai 60 a ni dawn a. Grand Slam tennis-ah a la tam ber tum a ni ang.
Singles inelna a champion pahnihin Dollar maktaduai 2.6 an dawng ang.
U.S. Tennis Association chuan main draw lut ten Dollar 80,000 an dawng a, second round lut ten Dollar 121,000 an dawng dawn tih an sawi.
US Open hnuhnung berah Dollar maktaduai 57.5 chu sem ral a ni tawh.
Kumin Australian Open-ah Dollar makatduai 52 sem niin Wimbledon leh French Open-ah Dollar maktaduai 49 sem a ni thung.