Aizawl : Aijal Club huaihawtin nimin khan Aijal Club lounge ah Aizawl tui tlan chungchang sawihona neih a ni a. He sawihona hi RL Rinawma’n kaihruaiin, sawihonaah hian EF & CC Deptt. atangin Lalrammawii Sailo (IFS); Director PMU PHE Er H Duhkima, Prof John Zothanzama HOD, Dept of Biotechnology, MZU, Vanlalhrima, Gen Secretary Save Mizoram River leh Zothanmawia, Commissioner AMC te an tel.
Aizawl tui tlan chungchang sawihonaah hian ram ngaw chereu zel avanga Aizawl tui tlan ber lui tuiin kiam lam a pan zel chu ngaihmawhawm a nih tawh thu leh luia lei nawi tam ta lutukin harsatna hrang hrang a siam te an sawiho a. Chemical biological leh medical lam bawlhhlawh tui ah a tam thu leh mihring hriselna atan a hlauhawm thu sawiin, WHO (World Health Organisation)-in mihring tui tlan atana thianghlim a tih chin a pha lo hle niin an sawi bawk.