Ukrainian thuneitute chuan Russia-in an president lamtang hnai tak fanu, Darya Dugina-i car-bomb hmanga beia a thihnaah an special services an inrawlh nia a puhna chu an pha.
“Hetiang lam hawiin thil kan ti ngai lo,” tiin National Security & Defence Council Secretary Oleksiy Danilov chuan a sawi.
Kum 29 mi, Dugina-i hriat rengna hun hi Thawhlehni khan Moscow-ah hman a ni.
Russian nationalist TV channel-a commentator pakhat, Dugina-i hi Moscow daia a chuanna car tihpuahah a thi a ni.
A pa, Alexander Dugin hi mite hneh thei tak niin amah zawk hi beihnaah hian tum zawk nia ngaih a ni a. Ukrainian ram pawh luaha New Russia (Novorossiya) din duha tlangau nasa thei tak, President Vladimir Putin-a’n kum 2014-a Crimea a luhchilh pawh tha ti leh thlawptu a ni.
President Putin-a chuan Dugina-i thahna hu demin ‘nunrawnna leh pawikhawihna tenawm tak’ tiin a sawi a, Order of Courage a hlan bawk.
A pa, kum 60 mi chuan a thlahnaah ‘a nunkawng zawha par chhuak tan mek’ tiin a sawi a. A mithmuhah ngei Russia hmelmaten an that tih sawiin, hei hi Ukraine laka hnehna chan duhtirtu a nih thu a sawi.
Kyiv-ah chuan security & defence council secretary chuan bomb puakah Ukraine inrawlhna a awm lo niin a sawi a. “Kan nula leh tlangvalten a aia pawimawh zawk tih tur an ngah lutuk. FSB-in an ti a, kan mite tih angin an lantir leh si a ni,” tiin Ukrainian TV hnenah a sawi.
Danilov-a chuan Russia hian an ram chhungah ngei pawh indonaah thlawptu an tlakchham zel avangin an ramah hetiang beihna thlena mipui fuih phur thar leh an tum niin a sawi bawk.
Presidential office adviser Mykhailo Podolyak pawhin Russian thil kalpui dan ber chu ‘phuahchawp khawvel’ a nih thu a sawi a, car bombing pawh Russia-a an special services chhungkuaa buaina inmung pakhat a nih thu a sawi.
Russia-a Federal Security Service (FSB) chuan he thil thlengah hian Ukraine an puh hlawm tawp a. An sorkar TV-ah uar takin an puang a, Kremlin lam tantu tam tak chuan a rang thei ang bera phuba lak an duh thu an sawi hlawm.
Dugina-i hi a pain thawm a neih len piah lamah hian Russia-in Ukraine a rûn mek thlawptu langsar ber zinga mi a ni a. A pain a din, International Eurasian Movement organisation tana tlangautu ber a ni bawk.
Kremlin tantu chanchinbu hrang hrangah an ram tan zawnga a thu ziah a chhuak deuh reng a, UK chuan July khan ‘Ukraine kaihhnawihthil dik lo nasa taka thehdarhtu’ nia sawiin a lakah hrekna a lek nghe nghe a ni.