Aizawl: Congress party thalaiin Legislative Assembly Session neih meka Congress Legislature Party Leader Zodintluanga’n Border Area Development Programme (BADP) hna estimate atanga 25% a changtu minister hnena pek zel ngai anga sawi awm hrilhfiah tura a zawhna chu RD Minister Lalruatkima’n chhanna mumal a pe lo nia sawiin, sawifiah thuai turin an phut.
BADP hnuaia hnathawhna sum hmanna hlep awmna CLP leader-in a zawhna a sawi zaunaah, “BADP hna hi BDO, EE Directorate te hi a thawktu an ni thla vek mai a, henga pawisa hlepte hi khawnge a awm tak, official level-a lar em em, Mr. 25 percent-a tih te a ni a, henga pawisa hlepte hi official atanga la letin engtin nge kan hman?” a ti a. ‘BADP atana kum 2019 hnu lama sum hmuh Rs. nuai 8,077.55 hlep kha eng account-ah nge an dah?’ tiin a zawt niin Congress thalai chuan an sawi a. RD minister-in chhanna mumal a pe lo niin an sawi.
Congress party thalai chuan CLP leader zawhnaah RD minister-in chhanna mumal a pe lo nia sawiin, “RD minister hian BADP hnuaia hna lo kalte EE Directorate leh BDO te a thawhtir atang hian 25 percent chu a lo hauh reng em? Hnathawh atanga hlepte hi khawiah nge a awm? A hlep hi engtia hman nge a nih tih kan zawt nawn,” an ti a. BADP hna atanga 25 percent kal ralna chu rang taka mipui hriata puanzar an phut tih an sawi bawk.