Mizoram sorkarin zu khapna dan kalpuina tur, Mizoram Liquor (Prohibition) Rules, 2022 a pawm fel hnuah tun hnai khan gazette-a daha tihchhuah a ni a, rules-ah hian Mizoram chhunga grape wine siam leh zawrh phalna a tel.
MLP Rules-a a lan danin grape wine fakna chu media-ah emaw, hoarding-ah emaw tar chhuah phal a ni lo a, sakhaw biakna hmun leh zirna in hnaiah hralh chhuahna hmun siam phal a ni lo a, a hralhtuten pawn lam atanga lang thei turin grape wine-te an dah lang tur a ni lo a; an hralh chhuahte chu lehkhaa uluk taka funin langtlang lo bag-ah dah tur a ni.
Grape wine umah hian, ‘Drinking wine is injurious to health’ tih a inziak tur a ni a, a man (maximum retail price) tar lan tur a ni a, grape wine hi Mizoram pawna hralh turah chuan ‘Not for sale in Mizoram’ tih ziah lan tur a ni a, sacrament atana hman tura siamah chuan ‘Sacramental Wine’ tih ziah lan tur a ni bawk.
MLP Rules-ah hian grape wine rules kalpuina tur mumal taka ziah lan a la awm lo a, license pek chhuah dan tur leh a dil theih dan tur te, chhiah lak zat turte tar lan a ni lo.
Grape wine man tur pawh tar lan a ni lo a, wine tak (alchohol) awm zat tur pawh tar lan a ni lo a ni.
Heng thil pawimawh hrang hrangte hi sorkarin a ngaihtuah leh mek a, tihfel ngaite tihfel zawh a nih hnuah grape wine rules chungchangah hian sorkarin notification a tichhuak leh dawn nia thudawn a ni.
Mizoram sorkar chuan zu khapna tur bill, The Mizoram Liquor (Prohibition) Bill, 2019 chu March 20, 2019 khan pass a ni a, May 28, 2019 khan notification tichhuakin, he dan hmang hian zu khap a ni a, hun eng emaw chen buaipui a nih hnuah zu khapna kalpuina tur rules chu tun hnaia Council of minister thukhawmin a pawm a, September 7, 2022 khan gazette tihchhuah a ni ta a ni.