Aizawl : National students’ union of India (NSUI), Mizoram state-in RUSA hnuaia college hrang hrang tihhmasawn hna thawh te a hun taka zo ngei turin contractor te an ngen a. Department lam pawh hna vil ngun turin an ngen.
NSUI, Mizoram state chuan RUSA hnuaia, college thawmthat hna hrang hrang, contractor te hnena sum tam tak pe lawka thawh, la thawh zawk loh tam tak a awm nia sawiin, pawi an tih thu an sawi a. RUSA hnuaia college hrang hrang thawmthat hna thawh thenkhat chu an endik thu sawiin, hnathawh tha tak tak an awm laiin, hna muang, hnathawk mumallo tam tak an awm tih an hmuh thu leh pawi an tih thu an sawi.
“Kan ram siamthatna tur sumpai tam tak hnathawh muan vang leh thawh chhiat vanga kan chan fo hi NSUI Mizoram chuan pawi kan ti” an ti a. Ram hmasawnna tur hnathawh hrang hrang te vila an endik tur thu leh contractor te pawh a hun taka hna zo tur leh sum ruahman ennawn beisei lo tura an ngen thu an sawi bawk.