Aizawl : Congress party thalaiin sorkar hnathawkte hlawh a hun taka pe thin tawh turin Mizoram sorkar an phut.
Mizoram pradesh youth Congress committee (Congress party thalai) chuan Chief Minister, Finance changtu ni bawk Zoramthanga kaihhruai sorkar-ah sorkar hnathawk ten a hun takah hlawh an la ngai ta lo chu lungchhiatthlak an tih thu an sawi a. “Sorkar hnathawk ten thla chanve a ral dawn tawha hlawh an lak theih tur thu kan Minister zahawm tak tak te zingah hmai uang taka TV leh chanchinbu lama puanzar tura an puang duh hial ta te phei hi chu thil zahthlak tawpah kan ngai a ni” an ti.
Congress thalai chuan Sorkarin a hun taka sorkar hnathawk te hlawh a pek theih loh avangin sorkar hnathawk tam tak loan chi hrang hrang la ten a hun takah a loan lak an rul thei lo nia sawi- in, “hei hian bank lama an record tichhiain, loan an puk leh zel na tur pawh nasa takin a nghawng buai mek” an ti a. Sorkar hnathawk ten a hun taka hlawh an la thin lo chuan Mizoram mipuite nasa takin a nghawng buai mek nia sawiin, sum lengvak a tlem a, mirethei leh harsa zawk te phei chu a nghawng buai nasa zual niin an sawi.
Hun kaltawh leh Congress sorkar kaltaah sorkar hnathawk te hlawh thla tawp ni-ah emaw, thla thar ni khatah emaw a lut thin nia sawiin, Congress thalai chuan “MNF sorkar kalmekah hi chuan group B leh C te hlawh ni 10 hmain a lut ngai meuh lova, group A leh B te phei chuan ni 10 leh 20 inkarah hlawh an la ve thei tawk thin” an ti.
Sorkar hnathawk ten an hlawh atanga sum an dah that GP fund pawh an mamawh hunah an la chhuak thei ngai lo niin Congress thalai chuan an sawi a. Sorkar hnathawk pension tawh te pawh sorkara thil tithei tak an nih loh chuan an pawisa lak tur ang an lachhuak thei lo mek niin an sawi.
Congress thalai chuan Zoramthanga kaihhruai sorkar chu sum neih loh chhuanlama COVID19 hmang tawh lo turin an ngen a. “MNF sorkar hian a duhna lamah leh hlawkna an tel theihna turah chuan sum tam tham tak pawh an thehchhuak pawp pawp thei reng a, a michhawr te hlawh pawh a pek hleihtheihloh mek laia, SEDP Rs. nuai 3 aia tlem lo ni lo, cheng nuai thum aia tlem Rs. 25,000 sem a tum mek pawh hian MNF sorkar Zoramtanga kaihhruaiin kan ram an tihchhiat nasat zia leh retheihna khura min hruailuh thuk tawh zia a ti chiang hleah kan ngai a ni” an ti bawk.