Queen Elizabeth II kuang chu ni li chhung mipuiin thlahna hnuhnung leh zahna hlanna hun hawn a nih hnuah sorkar chawimawina famkim nen Thawhtanni khan vui a ni ta.
Westminister Hall-a a ruang an dahna hmun atangin a vuina biakin, Westminster Abbey panpui phawt a ni a, hetah hian sawm bik mi thahnem tak an tel a. Sakhaw dana vui a nih hnuah Windsor Castle panpui leh niin chhungkuaa vui leh thlahna hnuhnung neih leh a nih hnuah phum a ni.
Sorkar chawimawina nena vui hun hman tawhah kum 60 dawn liam taa Winston Churchill-a vui hnua punkhawm leh ngaihven ber a ni a. Buckingham Palace chuan a vui dan tur hi amah ngeiin tam tak chu a lo duang lawk niin a sawi.
London khawpui lailia Westminster Hall-a mipuiin an hmuh theih hun chu zingah khar niin Westminster Abbey panpui zui a ni a, biak ina vui inkhawm hi an ram sanaa chawhma dar 11:00-ah tan a ni.
Westminster Abbey-a vui inkhawmah hian ram hrang hrang hruaitu lawkten lal chhungkua tawiawmin an tel a. UK-a politician hlun zual leh prime minister hluite an tel bawk.
Europe khawmualpuia lal chhungkua an tel deuh vek bawk a, anni hi Queen nena thisena inzawmna la nei an ni tlangpui.
Abbey hi Royal Navy sipai 142-in an State Gun Carriage hmanga a kuang hnukin an thlenpui a. Laipui phurhna hi kum 1979-a Prince Philip-a patea, Lord Mountbatten-a vui hnua kuang phurh nana hman leh hmasak ber niin kum 1952 khan Queen pa, George VI ruang phurh nan hman a lo ni tawh bawk.
Queen kuang hi Royal Standard hmanga khuh a ni a, a chungah Imperial State Crown, Sovereign’s orb leh sceptre dah niin King Charles-a’n Buckingham Palace leh a chenna in, Clarence House leh Highgrove-a mi pangpar a thlan chhuah hmanga a kuala siam dah a ni bawk.
A kuang hi lal chhungkuain kein an zui a, heng zingah hian lal thar leh a fapate pahnih, Prince William leh Prince Harry te pawh an tel.
Vui inkhawm hi Scottish leh Irish regiment-a mite bakah Royal Air Force leh Gurkha ten tawtawrawt an ham leh khuang an vuak hmanga tan a ni.
Biak in panna kawngtluanah hian Royal Navy leh Royal Marines an intlar a, Parliament Square-ah sipai chi thumin zahna hlanin Royal Marines band-in rimawi an tum bawk.
Vuina inkhawma Queen nun leh amah hriatrengna hun hmannaah hian sawm bik mi 2,000 an tel.
Sorkar chawimawina famkima vui inkhawm hi lal leh queen tana voh bik niin dan zam tam tak a awm a, heng zingah hian sipai chet vel dan hrang hrang a tel.
Abbey-ah hian mi tam tak vui tawh niin Britain king leh queen te lallukhum khumtirna hmun a ni a, Queen ngei pawh kum 1953 khan khumtir a ni a. Princess Elizabeth a nih laiin kum 1947 khan Prince Philip nen an innei bawk.
Vui inkhawm hi Dean of Westminster David Hoyle chuan kaihhruaiin Archbishop of Canterbury Justin Welby chuan thuchah a sawi a, Prime Minister Liz Truss-in thuchah a chhiar chhuak bawk.
Dean hian inkhawm tan nan Queen-in ‘lal a nihna leh Commonwealth hotu a nih anga thil tam tak a tih’ thu a sawi.
Hla sak zingah ‘Lalpa chu min vengtu a ni’ tih pawh telin Crimond thluka sak a ni a, he hla hi Queen chenna pakhat, a thihna hmun ni bawk, Balmoral estate atanga hla lo tak, Aberdeenshire atanga phuah chhuah a ni a. Duke of Edinburgh nen an inneih tum pawh khan sak a ni bawk.
Inkhawm tawp dawnah Last Post tihrik niin ram pumah minute hnih chhung sunna hun hman a ni bawk.
Hnam hla tihrik zui a ni a, Queen tana tawtawrawt hamtu bikten an ham bawk a, inkhawm hi chhun lai velah a zo a ni.
Queen kuang hi Westminster Abbey atang hian kein London-a Hyde Park Corner-a Wellington Arch panpui zui a ni.
Kalkawngah sipai leh police an intlar a, Big Ben chu minute tin a inkhawng ri a. Hyde Park atangin minute tin gun salute pek a ni bawk.
London khawpuiah hian kawng an zawhpuina thler tinah mipuiin an lo chang a, mel tam taka thui an intlar a ni.
Biak in atanga zawn chhuah hi Royal Canadian Mounted Police-in an hruai a, anni hi ho sarih niin band an nei theuh bawk a. Hengah hian UK leh Commonwealth-a sipai bakah police leh NHS mite an tel hlawm.
Queen kuang phurtu tawlailir hnungah hian King leh lal chhungkaw member-te an kal.
Biak in atang hi chuan Camilla, Queen Consort, Princess of Wales, Countess of Wessex leh Duchess of Sussex te pawhin an tawimawh tawh a ni.
Wellington Arch an thlenah kuang hi State Hearse-ah hlan niin Windsor Castle panpui leh a ni.
He castle hi lal hrang hrang 40-in kum 1,000 dawn an lo luah tawh niin Queen pawh hi a dam laiin a cheng nasa hle a. A tleirawl lai, Indopui II-na hun lai khan London khawpuiah bomb a tawrh laiin a khawsa ngar ngar a, coronavirus hripui a len lai pawh khan a awm char char bawk.
Hearse hian chawhnu dar 3:00 velah Windsor Castle-a Long Walk a thleng a, a kalkawng hi km nga vel niin a kawngah sipai an intlar.
Vantlang pawh Long Walk-ah hian luh phal an ni a, chhungkuain thlahna hun an hman lai chu an thlir thei.
King leh lal chhungkuaa a hlun zualin Windsor Castle-ah hian Quadrangle-ah chawhnu dar 3:40-ah hun tawi an hmanpui leh bawk ang.
Castle-a hun hman chhung zawng hian a chhunga Sebastopol leh Curfew Tower bell chu minute tin tihrik a ni a, a tual atangin gun salute pek a ni bawk.
Kuang hi St George’s Chapel-ah luhpui lehin vuina hun hnuhnung ber hman zui a ni.
St George’s Chapel hi lal chhungkuain inneih leh invuina atana an hman fo thinna a ni a. Duke leh Duchess of Sussex, Prince Harry leh Meghan pawh kum 2018 khan he hmunah hian inneiin Queen pasal, Prince Philip pawh vui a ni bawk.
Vuina hnuhnungah hi chuan mi 800 chuang hret chauh an tel tawh a, Dean of Windsor David Conner chuan kaihhruaiin Archbishop of Canterbury Justin Welby-a’n hun a hmang.
He inkhawma tel tam zawk hi Queen chenna leh a private estate hrang hranga thawk lai leh lo thawk tawh thinte an ni a, he hun hi an vui mekte lalna a tawp ta tih entirna chi khata ngaih a ni.
Inkhawmah hian Imperial State Crown leh Sovereign’s orb leh sceptre chu Crown Jeweller-in a la thla a, a tawp nan Queen hnen atangin a lallukhum lak a ni ta a ni.
Hla hnuhnung ber sak zawhah King-in Grenadier Guards company camp colour leh flag chu kuang chungah a dah a. Grenadier Guards an tihte hi Foot Guards niin lal hun pawimawha che chhuak thin an ni.
Lalin hetiang a tih mek lai hian MI5 chief hlui, Lord Chamberlain Baron Parker chuan a tiang titliakin kuang chungah a dah ve a. Inkhawm tihtawp zui a ni.
Queen kuang chu royal vault-ah tihhniam a ni a, Sovereign’s piper-ten rimawi tiriin ‘God Save the King’ an tum a. Windsor-a piper-te rimawi tum hi Queen-in ti tura a tih niin Buckingham Palace chuan a sawi.
Rimawi a tawpah vuina hnuhnung chu tawpin King leh lal chhungkaw member dangten chapel pawh an chhuahsan zui.
Tlaiah chhungkuaa hun hman leh a ni a, Queen chu a pasal, Duke of Edinburgh kiangah, King George VI memorial chapel-ah phum a ni ta a, an phumna hmun hi St George’s Chapel bul mai a ni.
A thlanah hian marble slab-ah ELIZABETH II 1926-2022 tih ker a ni.