Aizawl : PC party-in “Myanmar raltlante ngaihsak turin Mizoram sorkar kan phut nawn” an ti.
PC party chuan Myanmar ram buai avanga Myanmar atanga Mizorama Zohnahthlak raltlante chhawmdawl hna thawk uar leh zual turin Mizoram sorkar an phut thu an sawi a. Zoram khua leh tui te dinhmun leh chanvo chang pha rih lo mahse, an manganna leh phurritte sutkian sak kawngah tun aia hma la uar leh zual turin Mizoram sorkar chu an ngen tih an sawi.
Myanmar mipui, Zohnahthlakte baihvai taka siamtu, dan lova roreltu Myanmar sipaite pawh an dem thu PC party chuan sawiin, “Kan unaute chunga hlei an lenna leh an sapatalna hi engti kawng mahin kan hrethiam thei dawn lova, an thlavang lo hauh uar zual deuh deuh turin Zoramthanga kaihhruai MNF sorkar pawh kan phut a ni” an ti bawk.