Aizawl: MNF Sr. Vice President Tawnluia’n Mizoram zalenna suala martarte chu ‘party ta an ni lo’ tia sawiin, ‘Mizo hnam martarte ta’ an nih thu a sawi.
MNF party-in Martarte Ni nimina an hmannaah he thu hi Tawnluia chuan a sawi a. Martarte thlanmual tur ngaihtuahtu commiittee pawh NGO leh kohhrante telna a nih thu sawiin, martarte thlanmual enkawl hna pawh Art & Culture Deptt. kuta a awm tawh thu leh Mizo hnam tana nun hlantu hmun hrang hranga phumte pawh eng emaw zat chu Martarte thlanmuala sawn an nih tawh thu a sawi.
Tawnluia chuan, “MNF khan zalenna sual kha an peih tawh lo ni lovin, kohhran, zirlai leh NGO te ngenna angin tihtawp a ni,” a ti a. “Kan hnam sipaiten hlauhna an nei lo, chaw nghei an huam, tawrh pawh an huam. Amaherawhchu, ram mipuite tlin tawk zelin kan kal zawk a ni,” a ti.
Martarte chu Mizo hnam dinchhuahna tura nun hlantute an nih thu sawiin, Tawnluia chuan Mizo hnam chu tuma tihbuai loh leh mahnia ro inrel a nih theihna tura nun hlan an nih thu a sawi.
“Kan hnam meichher chhitute leh Mizo nationalism kengtute an ni a, Kan hnam martarte hi harsatna tinreng paltlanga nunna hial hlantute an ni a, kan chawimawi tur a ni a, anamhni zahna chibai kan buk tur a ni,” a ti bawk.