Japanese pa pakhat, sorkar chawimawina famkim nena prime minister hlui, Shinzo Abe-a vui duh lotu zinga mi chu a duh lohzia lantir nan a inhal.
July thlaa thah tak, Abe-a hi September 27 hian sorkarin a vui dawn a, ram hrang hrang hruaitu tam tak an tel rin a ni.
Nilaini khan Tokyo khawpuia prime minister pisa bula pa pakhat inhal hmututen police an ko.
Officer-ten an thelh mih hnuah damdawi inah an hruai a, nikhua a la hria niin tual chhung chanchinbute chuan an tar lang.
A inhliam dan leh a dinhmun dik tak erawh hriat a ni lo va. Japanese chanchinbute chuan kum 70 chung lam niin an tar lang hlawm.
He thil thleng hi sorkar chuan engmah sawi a la nei lo va, hetih lai hian sorkar chawimawina famkim nena an prime minister hlui vui tumna chu vantlangah duh lotu an tam hle a, ngaihdan lakah pawh sum senna nia ngaitu an tam zawk.
Kum 67 mi, Abe hi July 8 khan an party tana a campaign laiin kah hlum a ni a. Japan-a prime minister ni rei ber thah a ni hi ram dang tam takin demin politics thila tharum thawhna thlen tlemna leh silai chelek tlemna hmun an nih avangin an ram pawh a thawng hle.
Sorkar chawimawina nena invui hi an rama an kalpui dan a ni lem lo va, Abe-a vui tumna pawh hi a duh lotute chuan mipui sum yen tluklehdingawn 1.65 ($ maktaduai 11.4) chuang a lo thlawna senna mai mai tur niin an ngai.
An rama eptu party lian, Constitutional Democratic Party pawhin an party hruaitute chu karleha vui hun hman turah tel lo turin an hriattir.