Denmark lalnu chuan kumina a vawi hnih nan Covid-19 a kai tih finfiah a ni tih Danish Royal Court chuan a puang.
Queen Margrethe hian Thawhlehni tlai atanga inenkawlna a lak tan avangin tun kar chhunga a tih turte a thulh vek.
Kum 82 mi, lalnu hi Thawhtannia Queen Elizabeth II vuina inkhawmah mi 2,000 vel tel zingah khan a tel ve nghe nghe.
Queen Margrethe hi Europe-a ram hotu ber ni rei tawh ber nihna chelh mektu a nih bakah British lalnu a thih hnuah queen nia roreltu awm chhun a ni mek bawk.
Queen Elizabeth nen khan third cousin an ni a, Queen Victoria thlah kal zel an la ni.
Queen Margrethe hian invenna a la vek a, February khan natna lang chhuak tlem neiin hri hi a lo kai tawh bawk.
Palace website-ah a thupuangtu chuan Fredensborg Palace-a enkawl a nih thu a tar lang.
A fapa, a hnua lal tur, Crown Prince Frederik leh a nupui, Mary, Crown Princess chuan a chawlh chhunga a ai lo awhin Copenhagen-a sorkar mi pawimawh leh European Parliament-a Danish member te nen intawhkhawm an neih tur pawh an lo thleng ang.
Queen Margrethe hi tun hnaiah London khawpuia Queen Elizabeth II thihna chhehvela a che hmuh tur a awm nual.
Pathianni khan Westminster Hall-a Queen ruang dah a nih lai khan crown prince zuiin an kal dun.
A tuka Westminster Abbey-a vuinaah khan Europe ram danga lalte nen an thuho va, an zingah hian King Carl XVI Gustaf (Sweden), Prince Albert II (Monaco) leh King Philippe (Belgium) te pawh an tel.
Kum 1972 khan Denmark rama hmeichhe roreltu hmasa ber ni tanin hetih lai hian kum 32 chauh a la ni a, a pa, King Frederick IX a thih avangin a aiawhin a lal a ni.