Assam Rifles patrol team chu nimin khan Arunachal Pradesh-a Tirap district-ah hel ni ngeia ngaihten lambunin an zinga pakhat an that.
Khonsa Lazu kawnga Sanliam Tri-Junction-a thil thlenna hmun hi Myanmar nena inrina bul lawkah a ni a. Sipaiten beihpui thlak nghalin a titute hi an dap zui nghal mek.
India hmarchhaka venhim hna thawktute hi helho hian vawi tam tak hetiang hian an lo bei tawh thin.
Arunachal Pradesh-a district pathum – Tirap, Longding leh Changlang hi Myanmar nena inri an ni a. Heng district-ah hian Armed Forces (Special Powers) Act (AFSPA) hman niin he dan hnuaiah hian sipaite hian thuneihna sang tak neiin a tul chuan mi kah mai theihna pawh an nei.
Heng lai hi helhoten ramri an kânna hmun a nih piah lamah Assam leh Nagaland-a hel pawl tam tak awmna a ni a. India-in dan pawna a dah helho hian Myanmar-ah awmna hmun an nei thin a, ram chhunga venhim hna thawktute beiin India-ah a rukin an lut thin.
Tun thla tirah pawh khan Assam Rifles sipaite tho hi Changlang district-ah beih an lo ni tawh a. He thil hi Jairampur police station huam chhung, Tengmo khuaa thleng niin state khawpui, Itanagar atanga km 300 vela hla a ni.
Helho hian anmahni lam pana Assam Rifles tui phur motor lo kal chu grenade-a lo vawmin silaiin an lo kap bawk a. Assam Rifles sipai pakhat thiin hliam tuar pakhat a awm bawk.
July 11 khan venhim hna thawktute chuan Naga hel pawl, NSCN (IM) mi leh sa ni ngeia an hriat mi paruk chu Longding district, Arunachal Pradesh-ah an lo that tawh bawk.
Nikum khan inlambunna lian tak thlengin Arunachal Pradesh-a Khonsa bialtu MLA Triong Aboh leh a thuihhruai mi 10 chu thah an lo ni tawh bawk.