Chief minister pahnih inbiakna hian rah tha chhuah zel se
Mizoram leh Assam chief minister te chu nilaini khan inkawmin, ramri chungchang leh kuhva ro tawlh chungchang an sawidun ber nia hriat a ni a, Assam nena tunhnaia kan buaina ber a nih miau avangin ram hruaitu lawk pahnih inbiakna hian rahtha chhuah ngei se a duhawm hle.
Chief minister pahnih hian state pahnih aiawh ve ve minister leh official-ten ramri chungchanga inbiakna an neih chu tluang takin a kal zel nia an hriat dun thu an sawi a; ramri chungchanga inbiakna awm chu lawmawm a tih thu an sawi dun bawk. Nikuma an inkawm tuma an sawi, kuhva chungchang an sawi nawn leh a, kuhva ro dan lo anga lo lut chu state pahnihin lo dan duna Mizorama chin kuhva hring erawh engti kawng maha dang lovin, a hralhna tur hmunah tlang zel nise an ti dun bawk a ni.
He an thusawidun pahnih hi kan buaina kal lai mek ve ve a ni a, a hlawhtlin nghal zel pawh a tha hle. Hruaitu lawkte inbiakna hian rahtha chhuah se, a hlawhtlin nghal zel pawh ring bawk ila, mipui hmaa hmaiphih tumna ringawtah erawh chang lo se a duhawm hle.
Assam Chief Minister Sarma chuan a tul chuan police-te hmangin kuhva hring chu dang lova tlangtir zel a tum thu Zorama chu a hrilh niin sorkar thuchhuah chuan a tarlang a, hei ringawt pawh hi ngaih tihthatna tham chu a ni phawt e. A hlawhtlin nghal zel theih nan mipui lam pawhin lo thlirin, lo enzui uluk zel ang u.