Congress chuan Ningani khan an president thar tur thlan tur atan bul an tan ta a, tun dinhmunah chuan an sawi rik rin ber, Rahul Gandhi chu a la hmin loh avangin Ashok Gehlot leh Shashi Tharoor-a te chu chuh tura langsar pahnih an ni mek.
Madhya Pradesh chief minister hlui, Kamal Nath-a pawh chuh tura sawi rik tel a ni a. “A rilru-ah a awm deuh va, a chuh ve mai thei,” tia sawi a ni.
Gandhi chhungkaw zinga mi hruaitu lu ni tura duh rawn ni lova kum 20 chuang hnua Congress-in an chief tur an thlan leh hmasak ber a nih hmel rih hle.
Union minister hlui – Manish Tewari, Prithviraj Chavan, Mukul Wasnik, Mallikarjun Kharge leh Karnataka chief minister hlui, Siddaramaiah te hming pawh sawi rik a ni bawk.
Hetih mek lai hian Chavan leh Wasnik bikte chuan chuh an tum lo tih an sawi chiang tawh.
Congress chhung siksawia insiam that a ngai tia party president hnena ziaka thu thlentu hruaitu 23, ‘G-23’ an tih zinga mite pawhinthlan chuh tura sawi rik zingah an tel a; mahse, tun thleng hi chuan an zingah pawh Tharoor-a chu a langsar ber a ni mek.
Tharoor-a hian Sonia Gandhi hnenah pawh a sawi tawh a, Gandhi-i hi tunah hian kum 2019-a Rahul Gandhi-a’n party chief nihna a kalsan hnua a lailawka chelh mektu a ni.
Nilaini khan Digvijaya Singh pawhin NDTV-in an kawmnaah Congress president thlanah hian a chuh ve thut mai thei tih a lo sawi tawh bawk.
‘Gehlot nge Tharoor’ tia an zawhnaah Singh chuan, “Kan la hmu ang a, kei pawh ka la awm a, engvangin nge kei hi tel lo tura min duh?” tiin a chhang.
“Tute pawhin an chuh thei a, September 30 tlaiah a chhanna chu in hmu ang,” a ti a. Congress chief nih tumte tan September 30 thleng hming pek theih a ni.
Pakhat chauhvin a chuh loh chuan Congress president tur hi October 17-ah vote thlak a ni ang a, ni hnih hnuah vote tlate chhiar zui a ni ang.