Aizawl: Peoples’ Conference (PC) party-in nimin khan an party Durbar Hall, Aizawlah General Assembly hmangin hruaitu thar an thlang a, President atan Sr. Vice President ni lai, Vanlalruata an thlang.
PC party president atanga chawl ta, Lalhmangaiha Sailo-in PC party hruai hna chu Sr. Vice President ni lai hnena a hlan hnuah nimin khan General Assembly hmangin Vanlalruata chu president atan an thlang zui.
Senior vice president atan Lalrinzuala Chawngthu thlangin vice president atan Lalrinmawii Fanai leh treasurer atan HK. Liansawta an thlang bawk.
President atana thlan thar, Vanlalruata chuan PC founder President Brig. T. Sailo hmalakna tipuitling tura theihtawp an chhuah zel tur thu a sawi a. “Brig. T. Sailo-in ram tana hmathlir thui tak neia eng emaw chen hma a lo lak tawh, Lal Thanhawla kaihhruai Congress party leh Zoramthanga kaihhruai, MNF party sorkar thinten an chhunzawm mumal loh avanga kum 35 liam taa six basic needs (kan ram mamawh bulpui parukte) vawiin thlenga kan ram dinchhuah nan leh hmasawnna atana hnukpui ber la ni fan hi kei leh ka thawhpuite hian tihhlawhtlin ngei tumin theihtawp kan chhuah zel dawn a ni,” a ti.
PC president thar chuan six basic needs chungchang sawi belhin, “ZPM party-in PC party mi leh sate thlem nan Brig. T. Sailo policy leh programme kalpui tur leh tihlawhtling tura an insawi thin hi PC party mi ni thinte leh Zoram mipui bumna hmanrua mai a ni,” a ti a. ZPM chu six basic needs tuipui ber anga lang siin economic policy an tlangzarh takah an dah tel leh si lo niin a sawi.
Mizorama political party-te zinga Bairabi Hydel Project tihlawhtling tur chuan PC party bak an awm lo niin PC president thar chuan a sawi a. “Bairabi hydel power project bik atana clearance awm tawh sa, bultan nghal theih, kan state pual liau liau hi kan sorkar phawt chuan kan bultanna tur a ni a, Tuivai leh Chhimtuipui kan khuap bawk ang,” a ti.