Aizawl : YMA, Sub-hqrs., hnuaia Science & environment committee-in nimin khan Mausen Middle school-ah Environment awareness campaign an nei a. Zirlai pakhatin a Sairawkherh chu an sikul zirtirtute hnena a hlan phal thu sawiin, Sava tihhlum a tum tawh loh thu a sawi.
YMA, Sub-hqrs., Science & environment committee member Dr. H Vanlalhruaia’n Tlawng lei (bridge) atanga a chhak lam leh thlang lam km 1 vel chu YMA-in a humhalh a nih thu sawiin, naupangte chu an nu leh pa te pawh hrilh thin turin a chah a. Leihnuaiah tui chi hnih a awm thu sawiin, a hnuai zawka tui engemawzat a kangchah tawh thu leh tuihna humhalh tura tlanga thing leh mau, ramngaw humhalh a tul thu bakah bawlhhlawh paih fimkhur a tul thu te, plastic lam chi chu lui kawra paih loh tur a nih thu te a sawi.
Ram tikang lo tura tanlak a tul thu pawh Dr. H Vanlalhruaia chuan sawiin, tur hmanga luia nungchate hrai loh tur a nih thu a sawi a. Ramdang atanga lakluh Sanghate Mizorama luia chhuah a that loh thu leh nungcha humhalh a tul dan te a sawi bawk.
DFO, Lunglei P. Lalchhandama pawhin ramngaw tihchereu zelin a nghawng thalo te leh humhalh a pawimawh zia te a sawi a. Ramngawi humhalh kawnga zirlai ten an tih ve theih hrang hrang te sawiin, polythene lam chi reng reng paih mai lova hman nawn zel uar tha a tih thu sawiin, a remchanna apiang ah thingphuna, bawlhhhlawhte a paihna hmunah chauh paih zel tur a nih thu a sawi.
YMA, Sub-hqrs, Science & environment committee chairman Malsawma Sailo-in Sava perhna atana Sairawkherh an hman tawh loh na tura an Sairawkherh sikul-a hlan tura a sawmna chu zirlai pakhatin chhangin, Sava tihhlum a tum tawh loh thu a sawi a ni.