Uttar Pradesh Legislative Assembly chuan Zirtawpni khan Code of Criminal Procedure (Uttar Pradesh Amendment) Bill, 2022 pawmin he dan hmang hian mi pawngsualtua puhte anticipatory bail phal tawh loh tur a ni.
UP Parliamentary Affairs Minister Suresh Kumar Khanna chuan bill a pharhnaah POCSO Act leh hmeichhiate laka mawi lo taka chea puhte chu anticipatory bail phalsak an ni tawh dawn tih a sawi.
Naupang leh hmeichhiate laka mipat hmeichhiatna hawia chete anticipatory bail phal lohna hian an thubuai kal meka finfiahna an tihchhiat theihna hun leh remchang a titlem sawt dawn niin a sawi bawk.
Dan hi hman a nih hnuah chuan thil tisuala puhten a tuartu emaw, thuhretu emaw vaua a dik lohna thupsak leh hmun tumna hun a nei tlem sawt dawn bawk niin Khanna chuan a sawi.
Assembly-ah hian Uttar Pradesh Public & Private Property Damage Recovery (Amendment) Bill, 2022 pawh pawmin he dan hnuaiah hian bungrua leh thil tichhiaten sorkara an bill let theih hun thla thum ni thin chu kum thum a ni tawh dawn a ni.
Khanna chuan dan siam that hian buaina chhuaka thi tu pawhin Rs. nuai 5 thleng lak theihna a nei dawn tih a sawi.
Zangnadawmna hi a tisualtu lak atanga a dawn tur a ni dawn bawk a ni.
Bill pahnihte hi Ningani khan pharh niin voice vote hmanga pawm a ni a. Rorel inkhawmah hian eptu party lian ber, Samajwadi Party leh an thawhpui, RLD MLA-te an tel lo va, anni hian tuna session kal mek hi an boycott a ni.