Indian Army chuan Jammu & Kashmir-a Uri-ah, Line of Control hrula Rampur sector-ah mi firfiak pathum thatin ralthuam leh hmanrua eng emaw zat an mansak.
Army chuan heng mi firfiakte hian tun hnaiah Pakistan-occupied Kashmir atangin India an lut niin an sawi.
“Tukin (Ningani) zing khan Hathlanga ramngwah mi chevel hmuh a ni a. An tum chu tihtlawlhsakin mi firfiak pathum thah an ni,” tiin Lieutenant General DP Pandey, Srinagar-a Chinar Corps General Officer Commanding chuan a sawi.
Lt. Gen. Pandey chuan Army hian September 18 khan mi firfiakten India luh an tum pawh an lo dangkir tawh niin a sawi bawk.
Ningania an chetnaah hian Army hian AK-47 rifle panga, pistol pariat leh hand grenade 70 an man tel bawk.
Lt Gen Pandey chuan tun hnaiah LoC lehlam, India lo lamah hian mi firfiakten che mai thei tura an inchhawpna hmun a pung hle niin a sawi.
“Kumin kum tir atang khan ramri kâna lo lut ru an awm tawh lo va, an inchhawp hnaihna hmunah hian Pakistan army commander-te hriatpuina lo chuan thlen theih a ni lo,” a ti.
Army hian kartirah khan Uri-ah hian beihpui thlakin LoC chhehvelah September 18 leh 19 khan chetla an awm tih an hria tih a sawi.