Congress party-in an president an thlan tur chuan ro an relna, Rajasthan-a sorkar insiksawi a hrin hmel a, an rorelna state-ah hian party chhunga neuh neuh a siam mek.
Chief Minister Ashok Gehlot-a’n president thlan hi chuh a tum tih sawi thawm a awm rin mek avangin Rajasthan-ah hian Sachin Pilot chu party hotu lianten a ai awh zui tur anga an duhthlan tur a nih mai hmel laiin thil a kaltluan hmel rih lo hle.
Gehlot-a lamtangte chu Pathianni khan Shanti Dhariwal-a chenna inah an thukhawm a, an zingah hian minister pawh pali an tel a; hemi hnu zan lamah Congress Legislature Party (CLP) thukhawmin chief minister tur pawh an tihfel rin a ni.
Chief minister thar tur hi Gehlot-a lamtang nihtir tumna a awm nia sawi a ni mek a. Hetih lai hian Minister Govid Ram Meghwal chuan, “Ashok Gehlot hi chief minister a la ni zui dawn,” tiin thuthar lakhawmtute hnenah a sawi thung.
Gehlot-a hi Pathianni zan khan Jaisalmer-a Congress MLA thutkhawmah a tel a. Hetah hian central-a an hruaitu, KC Venugopal leh state in-charge Ajay Maken pawh an tel a, an thuchhuak erawh hriat hman a ni lo.
CLP thukhawm hian Gehlot-a thlaktu tur an tihfel thuak rin a ni a, hetih lai hian party chief nihna chelh lailawktu, Sonia Gandhi-i’n a tihfel tur thu sawi a awm mek bawk.
Tar lan tawh angin Gehlot-a hi an party president chuh tura sawi rik rin ber a ni mek a; mahse, a lo tling a nih pawhin Rajasthan-ah hian Pilot-a tan kawng awlsam taka ken a tum lo nia sawi a ni a. Hetih lai hian an hruaitu lawk, Rahul Gandhi chuan an party chhungah ‘mi pakhatin chanvo pakhat’ kalpui chu an thutlukna a ni tih a sawi zin avangin tu emaw chu a ken a ngaih hmel tho.
Inthlan a chuh dawn nia sawi rik a nih atangin Gehlot-a hian atana rinawm hnena an thutthleng chu hlan a tum nia sawi a ni tawh.
Dhariwal-a chenna ina an thutkhawmah hian minister pali – BD Kalla, Mahesh Joshi, Mahendrajit Malviya leh Arjun Bamaniya te pawh an tel.
An zinga tel ve, independent MLA Sanyam Lodha chuan, “MLA-te duh dana thu tihtluk a nih loh chuan engtin nge sorkar a kal ang? A tli nghal dawn a ni,” tiin NDTV hnenah a sawi.
Rajasthan-ah hian independent MLA 13 awmin an zinga 12 zet chu Gehlot-a lamtang an ni.
MLA 200 awmna state assembly-ah Congress hian MLA 100 an nei a, Mayawati-i kaihhruai, Bahujan Samaj Party MLA parukin an zawm tawh a. Sorkar siam tura MLA 101 thlawpna neih ngai chu an pel tam lem lo va, hei vang hian independent MLA-te hi sorkar tinghettu atan leh siam nan an pawimawh hle a ni.