Gehlot-a thlaka Rajasthan chief minister tura sawi rik rin tak, Sachin Pilot-a hi tuna an sorkar mek theihna, assembly inthlan hnuhnung bera hnehna an chan theihna bulpui ber angin mi tam tak chuan an sawi thin a. Inthlana hnehna an chan hnuah pawh khan chanvo sang ber chelh tur pawhin rin thup a ni a; mahse, Gandhi-a thu angin Gehlot-a thachhangdawltuah a awm zui ta a ni.
Kum hnih liam taah khan Pilot-a hi a hel chiam nghe nghe nghe a, amah thlawptu MLA 18-te nen Delhi-ah inkulhin sorkarah chanvo lian leh pawimawh zawk chan an phut a. Thla khat chuang zet helin Gehlot-a lamtangte nen pawh an indawr hlei thei lo va, Gandhi leh Priyanka Gandhi Vadra ten an titipui hnuah an inlamlet thei chauh a ni.
Tun tumah hian Gandhi-a bawkin Gehlot-a’n chanvo lian pahnih a chan chu rem a ti lo niin a lang a, Pilot-a tan hun a inhawng chiah a nih hmel rih hle a ni.
Chief minister tura an sawi rik chungchangah erawh Pilot hi a tawng tha duh rih lo hle a, “Party hotuten an tifel mai dawn a ni,” tih bak a sawi lo.
Rajasthan hi Congress party-in India-a ro an relna state pahnih chauh an neih tawh zinga pakhat zawk a ni a, nakum kumtawp lamah inthlan an hmabak mai tawh bawk a. Sorkarna chan zui zel an duh a nih chuan party leh tu tan pawh thutlukna siam sual hlauhawm hun lai tak a ni mek a ni.