Canada-ah hian hurricane na tak ang hi a thawk ngai mang lo va, storm lian tak tak insiamte pawhin an ram a thlen meuh hi chuan a kalkawngah hmar lama tui vawt tak a tawh tawh thin avangin a chakna nasa tak a hloh tawh thin a, a chak thei tawh ngai lo.
Nova Scotia-in tropical cyclone a tawrh hnuhnung ber chu kum 2003-a Hurricane Juan a tawrh kha niin category two storm niin mi pahnih an thi a. Chenna in leh thlai tam tak a chhia.
Fiona hian Canada a thlen hma hian kar hmasa tir lam khan Puerto Rico leh Dominican Republic a nuai tawh a, tun thlengin power leh tui lakna an la nei tha leh lo a ni.
United States-a Florida pawh hurricane thawk tur avangin an buai mek a, tropical storm Ian chu Inrinni khan Caribbean-a a awm lai atangin a insiam chak mek a. Tun kar chhung hian hurricane chak takin Florida hi a nuai rin a ni.
Mi thiamte chuan khuarel thil pakhat, La Nina avang leh sik leh sa inthlak nasa avangin kumina tropical strom thawh theih hun lai hian kum dang aiin a tam zawk thei niin an sawi a. Sik leh sa inthlak avangin khaw lum, thlipui thawk leh ruah sur nasa a tam tawlh tawlh an ti bawk.