Chief Minister Zoramthanga’n Mizorama medical college awmchhun, Zoram Medical College (ZMC), Falkawn chu medical college changtlung, zirna in tha a nih theihna turin sorkar laipui kuta hlan an rawt thu sawiin, union health minister pawhin rawtna an thlen chu tihhlawhtlin tuma hmalak a tum thu a sawi.
Sorkar laipui hotute dawra kar hnih chhung Delhi-a a cham hnuah chief minister hian Inrinni khan Aizawl lo thlengin, a pisaah thuthar thehdarhtute a kawm nghal a, sorkar laipui kuta ZMC hlan an rawtna tihlawhtling tura Union Health Minister Mansukh Mandaviya a ngen thu leh Mizoram mamawh thil dang a thlen thute a sawi.
Chief minister chuan ZMC chu JIPMER, RIMS leh central sorkar enkawl medical college dangte dinhmun anga a awm theih an duh thu leh hma an lak thu a sawi a. Health department hnuaiah doctor rual telna study team siama uluk taka rawtna an siam chu sorkar laipuia thehluh a nih thu sawiin, “Hemi chungchang hi union health minister ka sawipui a, ani pawhin rawtna chu a hlawhtlin theih ngeina tura theihtawpa hmalak a tum thu min hrilh a, kan lawm khawp mai,” a ti.
Zoramthanga chuan ZMC chu sorkar laipui kuatah a awm chuan zirtirtu tur doctor specialist thiam zawkte pawh an thawh duh ngei a rinawm thu sawiin, zirna quality pawh a that phah ngei a rinawm thu a sawi.
Rawtna an siamah chuan central sorkar kuta hlan theih a nih chuan seat tam thei ang ber Mizoram tana hauh tum a nih thu sawiin, “A tam thei ang ber seat chu lak kan tum phawt a, kan rawtnaah chuan a chanve aia tlem lo kan rawt phawt a, zaa 35 vel chu hmarchhak state chhunga mite tan ni se kan ti,” chief minister chuan a ti.
Mizorama zirna in thenkhat sorkar laipui enkawl, MZU leh RIPANS te pawh ram pum huapa zirna tha a tling thei tih chief minister chuan sawiin, ZMC pawh sorkar laipuiin a lak chuan ram pum huap zirna in tha a nih theih an beisei thu a sawi.
Union Home Minister Amit Shah pawh a hmuh thu leh Assam Rifles Headquarters thar tur, Zokhawsanga sak zawh tawh hawng tura a sawm thu Chief Minister Zoramthanga chuan a sawi a. “Ka sawmna chu min pawmsakin November thlaah rawn zina rawn hawn ngei a tum thu a sawi a, a tahrik ni tak erawh chu a remchan hun enin, Mizoram sorkar a la rawn hriattir leh tur thu min hrilh,” a ti.
Zokhawsanga Assam Rifles Headquarters tur hawn a nih hunah Assam Rifles chu an insawn phei vek dawn em tih zawhna chu chief minister chuan, “A hotupa ber home minister-in luah theih tura a hawn chuan automotically-in lut nghal tura ngaih an ni a, a tuka lut nghal vut vut ni lovin, an insawn luh dan turte pawh ruahmanna fel fai an siam ang chu,” tiin a chhang.
Chief minister chuan sorkar laipui hotu lawkte hnena ngenna a thlen zingah MZU Southern Campus din chungchang pawh a tel tih sawiin, hemi chungchangah hian union HRD minister a hmuh thu a sawi a. MZU Southern Campus dinna tur sum chu Mizoram sorkarin tum lova sorkar laipuiin a tum theihna tura hma laksak turin a ngen niin a sawi a. “Union minister pawhin ka ngenna chu awm a ti a, hma min lakpui a tum thu min lo hrilh,” a ti.
Prime Minister Narendra Modi pawh hmuin Myanmar-ah remna a awm theihna tura hmalak kawngah a bultantu ni tura hma la tura a ngen thu Chief Minister Zoramthanga chuan a sawi a. Hemi chunchang hi India President Droupadi Murmu pawh a sawipui thu leh a lo ngai pawimawh hle thu a sawi.
Mizoram State Health Care Scheme atana Asian Development Bank atanga Rs vaibelchhe 1,000 an dil chungchangah pawh an hotute a hmuh thu Zoramthanga chuan sawiin, a chak thei ang bera hma lo lakpui turin a ngen niin a sawi a. MNF returnee-te in sakna tur tanpuina chungchang pawh prime minister leh union minister dangte a sawipui tih a sawi bawk.