Aizawl : Pang Zirlai Pawl chuan an zirlai tharte lawmna leh zirlai chawimawi phute chawimawina hun Inrinnia an buatsaihah ZPM leader Lalduhoma chu khuallian niin a hmanpui.
Lalduhoma hian thu sawiin, Zohnahthlak hnam hrang hrangte hi a inthendarh zawnga an awm chuan tihtham lohah a chhuak dawn tih a sawi a. “Kan vai hian unau vek kan ni a, midang nen khawsak hona kawngah a inla hrang zawng ni loin inpumkhat zawnga kan kal a ngai a, kan hnam hi ropui taka a dinchhuah theihna’n theihtawp kan chhuah a tul a ni,” a ti.
Pang zirlaite chu theihtawpa zirna kawnga tan la a, eirukna dopuiah sawmin ZPM Leader hian, “Zirna hi ram leh hnam than len zelna kawngah a pawimawh em em a, zirna kawngah theihtawp chhuah ula, kawng hrang hranga hlawhtlinna in chan ngei theih nan duhsakna ka hlan che u,” tiin, eirukna hi ram leh hnam hmelma, tichhetu a nih avangin zirlai pungkhawm zawng zawngte eirukna dopuiah a sawm a ni.
Aizawl Central Hall, Venghluia hun hmanah hian Pang Zirlai Pawl Vice President Hlimthangmawia’n a kaihruai a, hemi pual hian Lalduhoma hian Rs 20,000 a hlan a ni.