- Zirsangkima
‘U Zir, Aizáwlah hian maw … zirlai naupang sikul báng tih loha motor sut hlau lo ber i hria em?’
‘Hre mai lo … tute nge?’
‘Keiniho hi!’
‘Eng a!? Eng nge i sawi awmzia?’
‘Biak ina nalh taka inkhâwm thin, keiniho inkhâwm báng hian motor sut kan hlau lo ber—sikul naupang sikul báng tih loah chuan!’
He thu hi ka nau MS-a’n inkhâwm bàna min hrilh a ni—mi dang hriat lohin—zawi tê-in. Ka zak chem chem!
October 9, 2022 Pathianni hmang khân Mizoram Baptist Kohhran hnuaia Pastor Bial hrang hrangten inkhâwmpui kan hmang hlawm a. Keini Thuampui Bial pawh BCM Biak in, Muanna Vêngah kan inkhâwmpui ve a, hripui vànga hun rei tak inkhâwmpui hmang thei loa kan awm hnua Pathianin hun tha min pe leh hi a làwmawm hle mai.
Inrinni zàn inkhâwm bànah a ni kan TKP Secretary, ka nau MS-a chuan khi thu khi min hrilh ni. Ka ngaihtuah zui vang vang a …
Aizáwlah hian, a Presbyterian e, Baptist, Salvation, UPC e … lam ni loin, Biak in hrang hrang ka mitthlà nghâl zung zung a. Ka nau thu sawi khi kawngpui kama Biak in neite tán chuan a dik àwm mang e aw … ka ti zui ta a, ka tâwmpui viau. A! Kawngpui kama Biak in nei lo tán pawh a dikna chen a awm thoin ka hre leh zêl a. Kawng síra a phei zawnga intlara kal kher kan tum thin dàn atang te pawh hian! Pathian chibai bûk zo, Mizo Kristiante hi mi dangte tán ‘hnawksak’ kan lo ni reng dáwn mai a, ka ti rilru ta a!
A pak khu chî lahin Biak in gate páwna peh khûk nghâl lah kan ’sam a. Mahniaa a hranga inthiarfihlìma fianriala va peh khûk lam chu kan peih vak lo, thianzahoa peh khûk kher kan duh tlat—tui kan ti bîk riau emaw ni, Biak in kawt kawng síra inpáng-aw-inzial tuau tuau-in kan khu luih luih ta thin a. Motor tlàn vêl kan ngaihtuah tawh lo—inkhâwm báng, nalh taka inchei kan nih avànga sut thiang loah kan inngai emaw ni dáwn ni! Kan khûkna hmun hi vawi leh khatah vai ram, ring lo mite awm khâwmna hmunah insawn ta thut se, kan buai chhiava viau hian ka ring ta!
Kan kohhran bîk mai ni lo, Mizo eng kohhran pawh, inkhâwmpui leh Krismas leh hunpui dangah te hian, hmeichheho (nûho an tam mah tawh zâwk) hian ‘inkhâwm proof atán’ an ti nge maw ni, Biak in lang khera thlá lâk an han duh tlat thin a. Motor kawng, vàntláng tã-a intlara ‘posi’ han lâk kual vêl hi nuam an ti riau! ‘Lo tel ve rawwwh!’ tia an inauh khâwm chhúng lah a rei duh phian a. Changkànna-in a ken tel, thlalâk awlsamna kan hman dàn hi kei mi sual hian, changkãng viau-in ka hre ve tlat lo!
Motor sut hlauh loh bâkah thil dang dang ka ngaihtuah chhuak zêl a …
Pathianni tûk a ni a. Inkhâwm tùrin Muanna véng panin hmá takah scooty-in ka tlàn chhuak leh a—helmet khum loin—inkhâwm tùr ka ni miau a! Pathianni tûka inkhâwm kal tùr hian helmet ka khum ngai vak lo. Kan Biak in thleng tùrin traffic point tlàn pelh ngai a awm lo alãwm! Hemi tûk hi chuan Zuangtui péng ka tlàn pèl dáwn tlat. Helipad pan chhohna bulah traffic pulit an ding thin. Mahse, zîng kár a ni a, Pathianni a ni bawk a, traffic pulit ding an awm chuang lo ang, ti rilru chunga khum lo ka ni. Ka ‘hair-posi’ a chhiat ka hlau ve tho bawk si a!
Thui ka tlàn hma, Thuampui kàwn ka thlen chhoh hma daihin ka rilruah a hma zàna ka nau MS-a thu sawi kha a key dangin ka rilru-ah a rawn lût zawk mai: ‘Kan rama kan hotuten dàn an zam sâ zàwm loin Pathian chibai bûk ka tum ang maw?’ tih thu hian min rawn déng dawt mai a—ka zak leh!
Kawng sírah ka ding a. Scooty hnuaia ka helmet dah chu la chhuakin ka khum ta a. Kawng tluanin kan rilru kàwmin kan titi phei ta a …
A lang chinah chauh mihring (roréltu)-te dàn siam hi ka zàwm thin a; an hmuh phâk lohah chuan dàn bawhchhia, lei chawi tùr ka ni zing mawlh mawlh thin mang e aw … Ka hmuh theih leia roréltute thupêk mah, an hmuh phâk loha ka zawm peih loh chuan lei leh vàn siamtu, engkim chunga roréltu, engtik lai pawha min hmu rengtu; mahse ka hmuh theih loh vàn Pathian thupêk hi zawm ka va harsat dáwn êm! Traffic pulit man hlauh vàng chauha helmet khum; an hmuh phâk loha khum peih leh si lo ka nih chuan, ka chhúngril nun hi a lo va han tui-êk nasa tawh dáwn ve aw…! Pathian thianghlimna hmaah phei chuan, inlan tlâk ka va’n ni dáwn lo chiang tak! Hmuh theih chinah chauh dàn ka zàwm a; mi hmuh phâk chinah chauh màwi ka lo tum thin a nih hi maw le … Pathian hmangaih lêtna tel miah loa hremhmun tlâk hlauh vàng chauha piangthar ang lek ka nih dáwn chu! Ka lo va han tenawm tak êm ve aw…
Keini Mizo ringtu, piangthar tawh, Amah zuitu inti site hi, mite hmuh phâk chinah chauh kan thianghlim em ni le? A lang chinah chauh tawngtai mi kan ni em? Kan khawlai nun te, kan pindan chhúng ril nun te leh Biak in chhúnga kan nun hi a in-‘match’ em? Hêng hi mahni theuh inzâwt chungin inkhâwm tùrin i inbuatsaih thin ang u.
Ka titi lai ka tàwp meuh chuan ka inkhâwmna tùr, Muanna véng Biak in chu thui fé ka lo tlàn pèl tawh a lo ni a, Muthi péng ka va thleng dâwrh mai! Ka kual a, Biak in pan chuan ka lêt leh ta a..