TB endikna khawl thar, Culture & Drug Susceptibility Laboratory chu District TB Centre, Falkawn-ah Health Minister Dr. R. Lalthangliana’n nimin khan a hawng.
Hawnna inkhawmah thu sawiin Dr. R. Lalthangliana chuan TB enkawlna chuan bung thar kaiin National TB Elimination Programme hnuaiah TB endikna khawl thar hawn a ni thei ta chu lawmawm a tih thu a sawi a. TB endikna khawl thar chu Mizoramah a hmasa ber tur a nih thu a sawiin, TB test-na khawl thar chuan rintlak zawka TB natna hmuhchhuah kawngah te, damloten damdawi an ngeih leh ngeih loh enzuina kawngah te a tangkai dawn tih a sawi a. Guwahati-ah sample thawn a, hun rei tak tak sen thin te, damlo enkawlna kawnga harsatna hrang hrang an tawh thinte chu sutkian a ni dawn tih a sawi.
Health minister chuan TB natna chu Mizoten kan ngaihthah tawh hle tih sawiin, TB natna chu ngaih pawimawh thara a invenna kawngah tan thar a ngaih thu a sawi a. Kumin January atanga June thla chhung khan TB damlo 1,000 chuang hmuh chhuah atang hian MDR-TB vei 60 chuang hmuh chhuah niin mi 39 TB vangin an thi tih a sawi bawk.
“TB test-na laboratory hi ruahman dan chuan June, 2020 vel atanga hman theih tur a tih a ni a. Thawh zawh tep a nih tawh laiin Covid-19 test nan hman lailawk a nih leh avangin hun a kal thui ta hret a ni,” health minister-in a ti.
Khawl hawnna hun hi Dr. Eric Zomawia, Mission Director National Health Mission-in a kaihruai a. Dr. Vanlalfela, State TB Officer chuan he baboratory dinna tura hmalak dan te a sawi a ni.