World Mental Health Day denchenin nimin khan National Mental Health Programme (NMHP), National Health Mission (NHM), Mizora- m bultumin rilru hrisel pawimawhna leh mitinin rilru hrisel an neih a pawimawh zia sawihona neih a ni a. Mizoram Journalists’ Association, MHIP, CYMA, MZU leh NGO hrang hrang aiawh te an tel.
He sawihona hun ah hian rilru lama harsatna leh damlohna nei a kum tela an pun thu sawilan niin, COVID19 hrilen hnuah phei chuan rilru hrisellohna zaa 25 laia a pun bakah mahni nunna la pawh zaa 10 laia a pun thu leh a enkawltute erawh an pun si loh avanga harsatna thleng te an sawiho a ni.
Dr. Vanlaldiki, Psychiatrist, Kulikawn Hospital-in thupui sawihawngin rilru hriselna chungchanga Mizoram dinhmun te sawifiah a. Vanlalzari, Legal consultant, DHME-in Mental Health Care Act, 2017 chungchang kalkhawmte a zirtir bawk.
Biakhluzuali Chenkual, Clinical Psychologist, Kulikawn-in taksa natna ang bawka rilru lam harsatna chu enkawl theih a nih thu sawiin, “mitin hi kawng kawng hmuhtu kan ni thei” a ti a. Ngawlveite enkawl bakah thangthar ruihhlova la fihlimte enkawl that leh venhim zel a pawimawih thu a sawi.
Lalrinhlui, Asst. Professor, RIPANS pawhin rilru lama harsatna nei ten taksa hriselna, rilru hriselna leh thlarau lama hriselna an mamawh thu sawiin, rilru hriselna nei turin mental health lama thawktute chauh ni lovin, pawl leh kohhran hrang hrang ten thawhhona tha neih a pawimawh thu a sawi a. “Heng harsatna sutkian hna thawk tur chuan thawhhona a pawimawh hle” a ti.
Lalchhanhima Sailo, Clinical Psychologist, DMHP-in National Tele MANAS programmes sawihawngin, he programme-a rilru lama harsatna nei, thingtlang kilkawr thleng pawha enkawlna dik, tha leh awlsam zawk an dawn theihna tura hmalakna leh hmachhawp hrang hrangte a sawi bawk.
Mental day workshop-ah hian rilru hriselna chungchanga ramin a mamawh leh hmlakna tur hrang hrangte kalkhawm ten an sawiho a. Thawhhona tha awm tur chuan inpawh tlang tak leh inthurual taka inzai tawn zel a pawimawh thu te an sawiho bawk a ni.