Aizawl : ZPM thalaiin RTI hmanga zawhna chhannaah MNF sorkarin central aṭanga a sum hmuh aṭangin ni 2.8.2019 ah ui fing 8 leiin, ui leina, training pêkna leh an chaw leh damdawi man bâkah, an chênna tur in sakna atân Rs. 18,40,000 a seng tawh niin an sawi.
Sorkarin ui fing a lei te chaw leh thildang mamawhah home department-in Rs. nuai 4 chuang a seng tawh bawk niin RTI chhannaah tarlan a nih thu ZPM thalai chuan an sawi a. Narcotic detection dog-te chu Aizawl, Champhai leh Kolasib-ah te duty tirin, operation-ah an hruai ṭhin nia tarlan a ni, an ti.
ZPM thalai chuan heng ui fingte hi lei an niha, training pêk an nih hnuah pawh, an duty-na ah tun thlengin ruihhlo chhuichhuah kawngah emaw thilda- ngah emaw hlawhtlinna chhinchhiahtlâk engmah an la neih loh thu RTI chhannaah tarlan a nih thu an sawi bawk.
“Chhawrna mumal awm leh si lova ui man tam lei a ni hi ZPM thalai chuan pamhmai kan ti a; sum tam tak luanralna niin kan hria” an ti a. “MNF sorkar hmasaka police mawza man tam leh ek in kal thei-te nen khan sum siamna, thil thuhmunah kan ngai” an ti.
Mizoram sorkar chu a enkawl thiam bak thil leh sum siamna niawma lang thilah inhambuai tawh lo tura an duh thu ZPM thalai chuan an sawi a. “Mipuite hlawkna tur leh ṭhatna tura chak taka hna thawk zawk turin kan ngen a ni” an ti bawk a ni.