Ukraine a rûn meknaa thapui a thawh thar leh mek laiin Russia chuan khawthlang ramte chu Kyiv pui tawh lo turin a vau nawn leh a, an pui zel a nih chuan anmahni leh Moscow inkarah buaina thar a chhuak zawk thei niin a sawi.
Russian palai hlun tak chuan Washington leh an thawhpui ramte chu Ukraine an puihnate chuan Moscow nena an inkarah thil tha lo zawk a thlen theih thu a sawi a ni.
Deputy Foreign Minister Sergei Ryabkov chuan khawthlang ramten Kyiv hnenah ralthuam an pek thin te, Nato ram thenkhata Ukrainian sipaiten training an nei thin leh Ukrainian sipaiten an beih lai tur tak an hriat theih nana real-time satellite data hmanga an puihna te chuan ‘Kyiv ram chhung buainaah khawthlang ramte a inrawlh thuk mai mai’ niin a sawi a ni.
A hma pawhin Russian thuneitu sang dangte pawhin hetiang tawngkam bawk hi khawthlang ramte lakah an lo cheh tawh thin.
“Russia hian direct taka United States leh Nato nena innghirnghova inep hi a duh lo va, Washington leh khawthlang ram khawpuite hian thunun phak loh hlauhawm lo thleng thei hi thunun nachang an hriat an ngai a ni,” tiin Ryabkov chuan a sawi niin Russia-a RIA-Novosti news agency chuan a tar lang.