Kerala-a hmeichhe pahnih, an chhungten an bo nia an sawi chu thah leh phum an ni tih hmuh chhuah a ni a, black magic leh mihring hlanna thil a ni tih police chuan Thawhlehni khan an sawi.
Roselin leh Padma te hi Ernakulam district-a khaw hrana mi an ni a, an pahnih hian nupa tuak khatin an retheihna um bova an hausak theih nan hlan atan an that niin police chuan an sawi a. Nupa bakah an agent chu man an ni.
Kum 50 chuang hret ve ve, Roselin leh Padma hi Ernakulam-a lottery ticket hralh thin ve ve an ni a. Roselin hi June thla khan bovin Padma hi September-a bo a ni thung.
An hrawk zai a ni a, an taksa chu nasa taka chan sawm niin Pathanamthitta district-a Thiruvalla khuaa hmun hranah phum an ni tih police chuan an sawi.
A thattua an puhte hi massage therapist Bhagavanth Singh leh a nupui, Laila an ni a. Nun nuam zawk an neih theih nana hetianga ti nia hriat an ni.
Mi dang an man tel hi Rasheed/Muhammand Shafi a ni a, Ernakulam atanga hmeichhe pahnih ru bova nupa hnena hruaitu nia puh a ni.
Police hian Padma bo an chhuinaah tualthahna hi an hai chuak a. Hmeichhe pahnihte phone an chhuinaah Muhammad Shafi hi chhui chhuakin thil an hre zui ta a ni.
“Kan chhuinaah hian Kadavanthara (Ernakulam) atanga hmeichhe bo hi Thiruvalla-a nupa inah hian thah niin chan sawm a ni a. Hausak duhna avanga mihring hlan atana tih a ni,” tiin Kochi City Police Commissioner Nagaraju Chakilam chuan a sawi.
Thu an zawhnaah June thlaa hmeichhe dang pawh an hlan thu an sawi a. Hei hi Roselin-i a ni tih police hian an hre zui ta a ni.
“In ngaiah, nupa ngai bawkin an ti a, a hruaitu pawh mi thuhmun a ni a. A lo tel ve pakhat hi chu an agent ang a ni a; mahse, hetiang tihna tura hmanrua a ni a, hetiang ti tura nupa puitu leh hmintu a ni,” a ti.
“Thubuai pum hre tur hi chuan hun kan la duh deuh dawn a, mi dang an inrawlh em tih pawh kan chhui zui zel,” a ti.