Russia hian Ukraine a rûn mekah hian Thawhtanni zing atang khan thapui a thawh thar leh a, Thawhlehni thleng pawh khan a la kap zui.
Ukrainian thuneitute chuan Russia-in an khawpui hrang hrang a la kah chhunzawm thu leh heng zingah hian chhimchhak lama Zaporizhzhia pawh a tel thu an sawi a, mi pakhat a thi niin an sawi bawk.
Chanchinbumite chuan Zaporizhzhia hian zan lama S-300 missile hmanga beih hrep a tawh hnuah ‘hun khirh takin a tuam mek’ niin an sawi.
Zaporizhzhia an kahna hi Ukraine hmun dang an kahna cruise missle aiin a upain a thawk na zawk niin an sawi bawk.
“Air defence system atana hman chi a ni a, khawmual kap tura hman a ni a, a kah chu a dik chiah lo va; mahse, thil a tichhe hnem hle,” tiin Al Jazeera-a thawk, Rory Challands chuan Kyiv atangin a sawi.
Thawhtanni bika Russian-te nasa taka an kahnaah khan Ukraine ram pumah mi 19 vel an thi niin an ram emergency services chuan a sawi.
Mi dang 105 velin hliam an tuar bawk.
Thawhtannia inkahnaah hian Kyiv khawpuia Kyiv leh region dang 12 zetah hmun pawimawh tak tak kah chhiat a nih thu emergency services chuan a sawi a. Khawpui leh khua 301 zetin power an neih loh phah niin a sawi bawk.
Thawhtanni atanga Russia-in tha thara Ukraine a beih lehna hi Kyiv-in Kerch Strait Bridge a bei nia a puh phuba lakna ni bera ngaih a ni.
Khawvelin Ukraine ram chin thova a ngaih, Kremlin-in a awp si, Crimea peninsula leh Russia inkalpawhna lei pawimawh hi Inrinni khan truck bomb tipuaka beih niin lei pawh a chhia a. Kyiv chuan an tihah chhal chiah lo mah se Russia chuan an tihah a puh nghet hle.
He lei hi indona kal meka Russia-in Ukraine chhim lam nawr tura a sipai dahte châk leh mamawh a pekna kawngpui ber a ni.