Mizoram chhuahsana Tripura-a inbengbel ta Tuikuk zinga mi 1,517-te chu Mizoram electoral roll atangin paih an ni tawh.
Election department atanga The Zozam Times thudawn danin, Mizoram chhuahsana Tripura-a awm hlen ta, Tripura roll-a thun duh, Mizoram Roll atanga paih dil mi 1,899 zinga mi 1,517-te chu Mizoram Roll atangin an hming thai chhiat a ni tawh a ni.
An zinga mi 1,325 te chu Mamit district chhunga awm thin an ni a, Kolasib district-ah 175 leh Lunglei district atangin 17 te an ni.
Tar lan tawh thin angin Tuikukte hi kum 1997 atang khan Tripura-ah an pem thla tan a, hemi hnu hian sorkar laipui ruahmannain Mizoramah hruai kir turin vawi tam ruahmanna siam ni mah se Tuikuk tam zawk erawh Mizoramah an kir duh lo a. Tuikuk chungchanga buaina hi kum tam buaipui a nih hnuah January 16, 2020 khan Tripura camp hrang hranga awm Tuikukte Tripura-a an awm hlenna turin inremna ziah a ni ta a ni.
Tripura-a awm hlente chu an inbengbel ngei a ni tih an awmna state sorkarin a finfiah hnuah Tripura roll-ah thun an ni a, Mizoram roll atangin thai chhiat an ni ta zel a ni.