Aizawl: Renu Sharma IAS, Chief Secretary, Mizoram chuan nimin khan Mizoram Civil Service Sport & Cultural Association Annual Sports Meet vawi 33-na chu a hawng.
Ramhlun Indoor Stadium-a hawnnaah hian khuallian chuan Annual Sports Meet 2022 neih a ni thei chu lawmawm a tih thu sawiin, “Sports hi taksa hrisel nana insawizawina tha berte zinga mi a ni,” a ti.
Player-te chu champion tuma tang taka khel theuh turin duhsakna a hlan a. Sports buatsaih chhan ber Mizoram sorkar hnuaia hnathawkte inhmelhriatna, inunauna, leh inthian thatnate a ni tih hre reng turin a fuih.
Dr. Chawngthanchhunga, Sr. Vice President, MCS&CA kaihhruaiah hian Lalthanzuala, Mizoram Police international badminton player-in oath taking hun a hmanga. Rosangliana, General Secretary, MCSS & CA chuan report pein, Covid-19 avanga kum hnih hnua MCS&CA Annual Sports Meet neih a ni leh thei ta chu lawmawm a tih thu a sawi.
Sports Meet hi October 11-14 inkar khelh tur a ni a. Sport discipline pali – chess, carrom, badminton leh table tennis-ah intihsiahna neih a ni ang. Mizoram sorkar hnuaia hna thawk mi 1300 vel an tel a ni.