Aizawl: School Education Minister Lalchhandama Ralte chuan a pisaah blind school-a zirlai mitdelte hman tur Braille text book a sem.
Thu sawiin school education minister chuan Mizoram tana chhinchhiah tlak tak zirlai mitdelten an chhiar theih tur zirlaibu an nei ve ta chu lawmawm a tih thu a sawi.
“Heng zirlaite tan zirlaibu an neih hmasak ber a ni a, an tan chuan chanchin tha a tling a, an khawvel hma lam a tieng hle dawn a ni,” a ti.
Lalchhandama Ralte hian high school zirlaite tan pawh Samagra Shiksha-te nen hmalak zui a nih tur thu a sawi a. Mitdelte tan pawh mi pangngaite nen inelna tha an nei thei tawh tur thu te, harsatna karah mi ropui tak tak an chhuak thin tih hre reng tura chahin, Braille textbook an neih thar chu khawvel hriata an talent pho chhuah nan a tangkai a beisei thu a sawi a, society tan pawh rah tha zawk an pek chhuah a beisei thu a sawi.
He huna MBSE Secretary Sarah Lalzampuii’n a tar lan danin, tun dinhmunah hian mitdel lehkhabu (braille textbook) dawng tur zirlai panga – higher secondary stage lamah an awm a. High school stage-ah hian mitdel lehkhabu dawng thei tur mi panga awm bawkin, large font print textbook dawng thei tur hi higher section-ah mi paruk leh high school-ah mi pasarih an awm mek bawk.