Aizawl: Aizawl South III bialtu MLA Prof. F. Lalnunmawia chuan Thawhtanni khan a bial chhung veng leh khaw thenkhat tlawhin sorkar hmalaknaa hmasawnna hnathawhte leh hmachhawpte a tlawh.
Prof. F Lalnunmawia hian Saikhamakawn playgorund, futsal leh volleyball ground chei that ngai te a tlawh bakah, he lai veng tui indaih lohna leh tanky mamawhna chungchang PHE engineer-te leh khawtlang hruaitute a sawipui.
MLA fund hmanga siam mek, Hlimen Vengthlang chuanhnuai internal road leh Smart City Project hnuaia Hlimena football ground siam mekte, Melthum GSA leh YMA-ten futsal ground an siam mek tihchangtlun dan tur leh MLA fund leh fund dang hmanga sak mek, Hualngohmun Community Hall bakah PHE JJM hnuaia Water Reservoir siam mek chu a tlawh bawk.
Aizawl South III bialtu MLA hian, “Hun harsa leh sum leh pai harsatna karah kan hotute duhsakna vangin Aizawl South III bial chhungah hmasawnna hmuh tur a awm chho ve zel hi a lawmawm takzet a. Kan sorkar hnuaia hna thawhte chu a thain belhchian a dawl tur a ni,” a ti.
“Tun sorkar term kal lai mekah kum hnih chuang lai mai Covid-19 vanga beisei anga hma kan lak chak theih loh laiin, tun kum khat vel hun kan la neih chhung hian khua leh veng hrang hrangah theihtawpa hmasawnna hna thawh kan tum dawn a ni,” a ti bawk.