ZPM Working President K Sapdanga’n “tunlai kan ram politics vir vel kan thlirin mipuite hian kalphung thar kan mamawh tawh a ni tih chiang takin a hriat theih” a ti.
Neihdawn leh North Khawbung khua te tlawhin nimin khan vantlang inkhawmah he thu hi ZPM Working President chuan a sawi a. Kalphung thar siama, ram kaihruai turin ZPM-in theihtawpin tan an la niin a sawi.
ZPM Working President chuan Congress party chungah lawmthu sawi duhna an nei nia sawiin, “policy kan duang a, a hmingah sustainable development & reform policy (SDRP) kan ti a, kan tlangzarh hnu chiah aṭangin Congress party hian min sawi sak nasa em em a, hmun tinah min sawilar sak nasa a ni,” a ti.
Mi thenkhat chuan engkim hi lei theihah an ngai nia sawiin, K Sapdanga chuan “mi duhthlannate pawh hi lei theih niin an hria” a ti a. “Mipuite pawh hian kan vote kan hralh a nih chuan kan thluakah sum a lut ve tihna a ni a, tumah inhmusit thei kan awm bîklo tihna a ni ang. Thluaka sum lut hruaitute leh thluaka sum lut mipuite indawrnaah ram hmangaihin awmzia a nei dawn lo niin a sawi.
“Inthlan dawn apianga sum nei apiang kan vote dawn a nih chuan politics hi khelh a ngai lo reng reng, chu chuan eng dinghmunah nge min thlen ang tih ngaihtuah a ngai a ni,” K Sapdanga chuan a ti bawk.