Aizawl : Kuminah palliative care hmangin damlo 1085 enkawl tawh an ni a, 324 te chu damdawi in-a admit an ni. Nikum chhung khan palliative damlo mi 2090 en niin, 209 te damdawi in-a admit an ni bawk.
Dinhmun hlauhawma ding damlo te leh an chhung ten nun nuam leh hahdam zawka hun an hman theihna tura inenkawlna leh hemi kawnga inzirtirna ni World Hospice & Palliative Care Day chu nimin khan Directorate of Hospital & Medical Education conference hall, Aizawlah Principal Director, HME Dr.T. Lalhmangaihi hova hman a ni a. Director, Mizoram State Cancer Institute Dr. Jeremy L. Pautu-in thupui, ‘Healing Heart & Community” a sawi.
Dr. Jeremy L. Pautu chuan “Cancer leh natna benvawn khirhkhan zual, dam beiseiawm tawh lo ten na hrehawm tak an tawrh lohna turin palliative care programme hmanga theihtawp chhuah a nih thu a sawi a. Damlo chhungte rilru leh taksa damna pawh ngaipawimawh tel a nih thu a sawi.
Khawvel leh India ramin palliative care a kalpui dan bakah a pawimawhna leh a awmzia te sawiin, mipui ten hemi kawnga zirtirna an mamawh dan te a sawifiah bawk.
Dr. T. Lalhmangaihi pawhin palliative care a awm hma chuan damlo tam tak, an na chhawksak lem lova na tak tuara mual liam engemawzah an awm thu sawiin, hemi kawnga puihna dawng an awm ngai loh thu leh an khawngaihthlak thu a sawi a. “Tunah chuan palliative care a lo awm ta a, damlo leh an chhung ten nun nuam zawkin hun an hman theih phah ta a, a lawmawm em em a ni” a ti.
Palliative care-in a tum ber chu Cancer mai ni lo, natna benvawn hrang hrang avanga damlo, dinhmun hniam leh thih hlauhawma ding mek ten rilru hahdam leh zangkhai zawka hun an hman theihna tur te, an na tawrh damdawi hmanga chhawk zangkhaisak bakah anmahni enkawltu an chhungte thlenga nun nuam leh hahdam zawka an awm theih nana hmalakpui a nih thu Dr. T. Lalhmangaihi chuan a sawi bawk.
Palliative care hi Mizoramah National programme for palliative care (NPPC) hmalaknain kum 2016, October atang khan kalpui a ni a. Serchhip leh district thar pathum tih loh Mizoram district dang zawng zawngah chuan kalpui a ni tawh a ni.