Italy a season bul tan tha tak Lazio kaltluang lai hmaah Fiorentina an ding a. An khingpuite chetthat dal thei bik lovin 4-0 in Lazio in hnehna an chang.
Thawhtanni zan Serie A a inkhel hi Fiorentina khelmual Stadio Artemio Franchi ah khelh niin a zawna vawi li nan league-ah Lazio an chak.
Biancocelesti hian hetih chhung hian goal 14 an khung hman a, vawikhatmah goal chhuah an nei lo bawk.
An tan star player pahnih striker rinrawl Ciro Immobile leh midfielder Sergej Milinkovic-Savic te an langsar leh a. Italy striker in goal khat a khung bakah midang goal khung tur vawikhat a siamsak. Serbian midfielder hian assist vawi hnih a nei ve thung.
Matias Vecino chuan minute 11-naah corner atang tauh lutin goal hmahruai a khung a. Mattia Zaccagni chuan minute 25-naah Milinkovic-Savic ball cross chu a tauh lut ve leh bawk.
Second half-ah Immobile-a’n crossbar a tihper hnuah substitute Luis Alberto goal khung tur a siamsak a. Milinkovic-Savic bawkin Immobile goal khung tur huntawp dawnah tha takin a siamsak.
Lazio hi table-ah pathumnaah an chhova, hetihlai hian Fiorentina hian Serie A inkhel hnuhnung pariat atang vawi khat chiah chak an la nei.
Biancocelesti coach Maurizio Sarri chuan, “Team hmasawnna chiang takin a lang a, kan thlen chin erawh kan chian a, hmalam kan pan zel a pawimawh. Kan tlarhnung kan veng tha sawt a, team angin hma kan sawn phah hle.” a ti.