Hmeichhe tleirawlte tana football inelna Khelo India U-17 Girls Football League 2022-23 chu Thawhlehni khan an khel tan.
Zarkawt a High Field MacDonald Hill ah Khelo India U-17 Girls Football League kickoff hi hman a ni a. Mizoram Football Association a Women’s Committee vice chairman Lalengvari chuan he league buatsaih a nih dan hi a sawi.
India in FIFA U-17 Women’s World Cup a thlen pualin, sawrkar laipui leh AIFF tangkawp chuan hmeichhiate tana football tihlar zualna tur atan inelna India ram khawpui hmun hrang hrangah a buatsaih thu a sawi.
Mizo footballer chhuanvawr Jeje Lalpekhlua chuan kickoff hun hi a hmang a. Tun FIFA U-17 Women‘s World Cup khelh turah India team a Mizo hmeichhia an awm lo chu pawi a tih thu a sawi a. He Khelo India U-17 Girls Football League hi Mizo hmeichhiate tan football a kailawn thar pawimawh tak a nih ngei a beisei thu a sawi tel.
He intihsiaknaah hian school paruk – Govt Mizo HS, Govt Central HS, Govt JL HS, Govt Hrangchhuana HS, Govt Aizawl East HS leh Kids Care School te an tel.
Zirna in parukte hi an inkhelh kual theuh hnuah a point hmu sang pahnihin final an khel ang.
Champion team in cheng sing nga an dawng dawn a. Pahnihna in cheng sing thum dawngin inkhelh apiangin team ten ‘match money’ cheng sang hnih zel an dawng bawk ang.