China hmar lam, an rama lungalhthei lai chhuak hnem ber pakhat, Shanxi province-a tun hnaia ruah sur nasa taka avanga tui lian leh chhiatna dang dang thlengah mi 15 vel an thi tawh a, mi pathum chin hriat lohvin an la awm mek tih sorkar chanchinbu chuan a tar lang.
Sorkar enkawl, Global Times chuan Thawhlehni khan mi maktaduai 1.75 velin tui lian hi an tuar tih sawiin mi 1,20,000 vel hmun himah sawnin chenna in 19,500 vel a chhia tih an puang.
Report-ah hian Shanxi tui liana a tuar na zual lai engmah tar lan a ni lo va. An province hi Beijing khawthlang lam, sq km 156,000 vela zau a ni.
Tuna an chhut thuaka thil chhia hlut zawng hi $ maktaduai 770 hi vel a nih tawh an ring.
Hetih lai hian Xinhua news agency chuan tui lian dinhmun hlauhawm leh khirh zual chu a ziaawm tan hret tih a sawi a. Lui lian lem lova tuite chu an chim chin a hniam hret tawh tih a puang.
China-ah hian an ram laili, Henan province-ah July thla khan nasa taka tui lianin mi 300 chuang an lo thi tawh bawk a. Tuna Shanxi-a lian leh hian thlasik lo thleng tura an mamawh an chhek khawmna lamah harsatna a thlen an hlau hle.
Shanxi-a hmun tam tak hi lui leh tua kalpawh theih loh niin kar liam ta khan ruah sur tam record a awm nual a. Lungalhthei khur tam tak pawh inkhartir an ni.
Xinhua chuan Shanxi-ah hian kar hmasa ni nga lek chhungin October thlaa ruahtui an dawn ang thin let thum zet an dawng tih a sawi.
Thlai chinna hmun hectare 1,90,000 chuang tui hian a chim chhe tawh niin tual chhunga Communist Party chanchinbu, Shanxi Evening News chuan a tar lang tih AFP news agency chuan a tar lang.
Video an tihchhuahah pawh chirh leh bawlhhlawh tam tham tak tak, khawpui chhunga a luang dul dul lai pawh a lang.
Sorkar enkawl, CCTV chuan hnathawktuten tuikhuah, lei leh relkawng, tuiin a tihchhiatte siam thaa an thawk laite pawh an tilang bawk.