Aizawl : Tourism Minister Robert Romawia Royte-in nimin khan Govt Hrangbana College-ah ‘Yuva Tourism Club’ a hawng a. India sorkarin thalai leh zirlai te tourism kaihhnawih thil hrang hrangah an tel tama, sustainable & responsible tourism an hriatna tura zirna in zawng zawnga ‘Yuva Tourism Club’ din tura a tih thu leh din chhoh mek a nih thu a sawi.
Mizoram sorkarin Beraw Tourist resort tihchangtlun zel a nih tuh leh Mawma tlang te pawh khualzin tam zawk tlawh tura chei a nih tur thu Tourism Minister chuan a sawi a. Project liantham PRASAD scheme atang leh EAP atanga sanction hmuh thuai an beisei thu sawiin, Anthurium festival leh Mizoramin a vawikhatna atana November thlaa International tourism mart a thlen turah mipui zawng zawng tel vek turin a sawm nghal.
Yuva Tourism Club hi sorkar laipuia Tourism ministry hnuaiah zirna in hrang hranga din tura ruahman a ni a. Hei hi Mizoram Tourism department pawhin bawhzuiin, Mizorama zirna in hrang hrangah din turin hriattirna a chhuah tawh a. Govt. Hrangbana College hi Mizorama he club hawn hmasak ber niin, zirlai 200 chuang an inziaklut tawh a ni.